Иако Европската централна банка (ЕЦБ) минимално ги смени фразите во својата одлука, од фразата покачена до опаѓачка инфлација, целиот контекст на вчерашната одлука е дека намалувањето на каматните стапки нема да почне порано. Сè уште се очекува ЕЦБ да започне со олеснување на рестриктивната монетарна политика кон средината на годинава.
Вреди да се спомене дека за првпат од почетокот на 2022 година, банките во еврозоната очекуваат мал пораст на побарувачката за кредити во првиот квартал од 2024 година, што доколку се реализира, навистина нема да ѝ оди во прилог на ЕЦБ. Тие очекуваат и дополнително заострување на условите за кредитирање, што значи дека поризичните кредитокорисници сè потешко ќе се задолжуваат кај банките, што може да им создаде проблеми на повеќе задолжени компании и домаќинства. Севкупно, рестриктивната монетарна политика функционира, но сепак во системот има вишок ликвидност, иако ликвидноста е 25 отсто пониска во однос на врвот во последните години. ЕЦБ треба да го намали тој вишок ликвидност на нивоата од пред пандемијата, односно да го преполови во споредба со сегашните нивоа, а за тоа ќе бидат потребни најмалку неколку години.
Пред два месеца пазарите очекуваа дека ЕЦБ може да изненади и да почне да ги намалува каматните стапки веќе на почетокот на пролетта годинава, што на задоволство на инвеститорите ги намали приносите на обврзниците. На пример, од минатогодишниот врв, приносот на 10-годишната германска обврзница падна за 60 базични поени, на 2,3 отсто. На почетокот на годината имаше дополнителни геополитички конфликти, но и рекордна понуда на нови емисии на обврзници, што повторно ги турна приносите нагоре. Имено, државите избрзаа да се задолжуваат што е можно порано, со оглед на тоа што во последните години гледаме дека никој не знае што нè чека. Со други зборови, да ги немаше овие елементи, сега приносите ќе беа уште помали.
Растот на цените на контејнерскиот транспорт за над 300 отсто може да се прелее на европските цени, иако ограничено, но ако ЕЦБ процени дека инфлаторните очекувања не се целосно закотвени, тогаш може да има подоцнежен почеток на намалувањето на каматните стапки. Пазарите гледаат шанса од 80 отсто за првото намалување на стапката во април. Сепак, некои важни податоци ќе излезат дури на крајот на тој месец, како што е состојбата на економијата во еврозоната, но и многу можното продолжување на растот на платите, особено во јавниот сектор. Очекуваме дека почетокот на намалувањето на каматните стапки ќе дојде во шестиот месец од годинава, најверојатно за 25 базични поени.
.webp){kind=icon}
Во моментов нема коментари за веста. Биди прв да коментира...