ББА-коментар: Фед ќе ја задржи каматата на исто ниво

На овонеделната седница очекуваме продолжување на комуникацијата на Фед „водена од податоци“, а со тоа гледаме и задржување на сегашните лимити на референтната каматна стапка. Имено, неодамнешните податоци се‘ уште не се доволно добри за да се започне со намалување на каматните стапки.

Пазарот на трудот, растот на платата на час како и инфлацијата која сè уште е над „магичните“ два процента се клучните причини поради кои очекуваме каматните стапки да останат во мирување оваа недела. Пазарите на капитал очекуваат токму ваква одлука и нема нарушувања поврзани со промени на каматните стапки. Акциите се под значително влијание на сегментот технологија и вештачка интелигенција, што ја зголемува нестабилноста, особено сега во времето на кварталните резултати.

Кривата на принос на американските обврзници останува инвертирана, иако само за 20 базични поени, што е најниско од почетокот на оваа година. Очекуваме кривата да се врати во нормална форма при првото намалување на каматната стапка од страна на Фед, имајќи предвид дека пократкиот крај на кривата ќе се спушти на пониски нивоа од сегашните.

Јавниот долг на САД продолжува да расте, како и износот на каматите, но силата и стабилноста на економијата ја одржуваат рамнотежата. Наесен очекуваме почеток на намалување на каматните стапки, со тенденција референтната каматна стапка да падне за 50 базични поени до крајот на годината поради натамошно олабавување на инфлаторните притисоци, што дополнително ќе ослободи простор за поевтино задолжување на компаниите и намалување на трошоците за финансирање.

 

Во моментов нема коментари за веста. Биди прв да коментира...

Остави коментар