Наш коментар: Што може да се очекува од „Тесла“?

Објавувањето на финансиските резултати на „Тесла“ (Tesla) за третиот квартал од 2024 година е сончев зрак во инаку релативно мрачниот период за компанијата. Периодот зад нас (барем последниот квартал) беше обележен со скептицизам на инвеститорите, особено околу ексцентричниот настан „Ние, робот“ (We, Robot), по што акциите паднаа за 8,8 проценти.

Консензусот е дека треба уште многу работа за да се направи технологија погодна за регулаторно усвојување и практична употреба, а инвеститорите не беа импресионирани и сакаа нешто поконкретно. Сепак, во исчекувањето на резултатите од третиот квартал во 2024 година, испораките на возилата и маржите беа под лупа со оглед на тоа што „Тесла“ е вклучена во ценовна војна со ривалите и нуди големи попусти за да ја стимулира побарувачката. Добрата вест е што вкупните приходи се зголемија за 7,8 проценти во третиот квартал од 2024 година споредено со третиот кварталот во 2023 година. Приходите од автомобилските операции (кои претставуваат 79,5 проценти од вкупниот приход) благо се зголемија за „Тесла“ (два процента во третиов квартал од 2024 година наспроти третиот квартал од 2023 година), додека бројот на испорачаните возила на годишно ниво се зголеми за шест проценти во третиот квартал од 2024 година. Приспособената ЕБИТДА маржа забележа раст од 2,4 процентни поени, главно поддржан од намалувањето на оперативните расходи за околу шест проценти (во третиот квартал од 2024 година во однос на третиот квартал од 2023 година).

Ентузијазмот за автомобилскиот бизнис на „Тесла“ е поттикнат и од изјавата дека до 2025 година ќе претстави и подостапен (компактен) електричен автомобил, нешто што инвеститорите го посакуваат долго време. „Тесла“ би уживала во повеќекратни придобивки. Прво, подостапен автомобил значително ја проширува базата на потенцијални потрошувачи. Второ, се дистанцира од кинеските производители што се конкурентни по цена, особено на пазарите што моментално стагнираат како што е Европа. Портфолиото на „Тесла“ е ласерски фокусирано на две возила - 94 отсто од испораките се седанот „модел 3“ (Model 3) и теренецот „модел ипсилон“ (Model Y), кои останаа цврсто непроменети неколку години, така што долгонајавуваните „модел 2“ (Model 2) и „роудстер“ (Roadster), за кои се разговараше на повикот со акционерите, потенцијално ќе ја освежат понудата. Инвеститорите исто така може да се радуваат на пониски трошоци за производство, имено COGS (од англиски: costs of goods sold) по возило падна на најниските нивоа досега, на износ од 35.100 долари (за третиот квартал во 2023 година беше 37.500 долари). Дури и загубарот, „сајбертрак“ (Cybertruck), оствари позитивна бруто-маржа за првпат во овој квартал.

Објавата веројатно беше пријатно изненадување за инвеститорите. Заработката по акција ги надмина очекувањата - остварени се 0,72 долари по акција, наспроти очекуваните 0,60 долари по акција. Поради тоа акциите скокнаа за речиси 11 отсто во продолженото тргување по работното време.

Ѕвезди на растот во овој квартал беа сегментите енергетика и продажба на регулаторни кредити (кои забележаа стапки на раст од 52 и 33 проценти, соодветно, во третиот квартал од 2024 година во споредба со истиот квартал во 2023 година), што во голема мера ги поддржа маржите. Станува збор за високопрофитабилни бизниси - производството и складирањето енергија има бруто-маржа од 30,5 проценти. Продажбата на регулаторни кредити ефективно има маржа од 100 проценти, бидејќи „Тесла“ обично секогаш седи на вишок регулаторни кредити и им ги препродава на други производители (кои не ги исполниле целите поврзани со производството на електрични автомобили). Овие дополнителни извори на приход се многу добри за профитабилноста на „Тесла“.

Ликвидносната позиција на „Тесла“ е одлична основа за понатамошен раст. Нето-паричните средства од работењето се зголемени за 89 отсто, а слободниот готовински тек за 223 отсто. Капиталните инвестиции (CAPEX) скокнаа за 43 отсто во третиот квартал од 2024 година во споредба со истиот период минатата година и сочинуваат 14 отсто од вкупните приходи. Иако оваа инвестициска стапка е значително повисока од стандардот во индустријата, „Тесла“ има голем простор за маневрирање во однос на понатамошни инвестиции и раст, токму поради солидната ликвидност. За плановите на „Тесла“ се потребни инвестиции, првенствено кога се земаат предвид плановите за проширување на производството на автомобили за 20-30 проценти, како и развојот на економичниот „модел 2“ (на нова платформа). Исто така, ако ја погледнеме инфраструктурата на станиците за брзо полнење на „Тесла“, бројот на станици се зголеми за 20 проценти во третиот квартал од 2024 година. Што се однесува до енергетиката, „Тесла“ гради фабрика за мегапак батерии во Шангај, а многу инвестиции се вложени во еј-ај компјут (AI compute) – технологија што е клучна за целосното самостојно возење, како и во автопилот-системи, кои имаат централно место во стратегијата на „Тесла“.

Кога станува збор за основниот, автомобилски бизнис на „Тесла“, очекувањата се претпазливо позитивни. Очекуваме приходите да продолжат да растат со едноцифрени до ниски двоцифрени стапки. Профитабилноста ќе биде под притисок, особено ако попустите продолжат, но со оглед на последователното намалување на трошоците за производство по возило и дополнителните високопрофитабилни бизниси, се очекува стабилна профитабилност на краток рок (со задржување на дисциплината на трошоците). На „Тесла“ сега ѝ треба силен четврти квартал во однос на продажбата за да ја надомести намалената побарувачка прикажана во полугодишните извештаи. Од перспектива на производството и стратегијата, „Тесла“ се наоѓа во расчекор. „Кеш крава“ на „Тесла“ сè уште е платформата „модел 3/ипсилон“, а целосното автономно возење, потенцијалниот нов модел, флота-услугите и споделување на возењето (ridesharing), а со тоа и масовното производство на „сајберкеб“ (Cybercab), допрва треба да се материјализираат.

 

Во моментов нема коментари за веста. Биди прв да коментира...

Остави коментар