„Тесла“ (Tesla) планира да го лансира напредниот систем за помош на возачот, кој го нарекува технологија „фул селф драјвинг“ (Full Self Driving / FSD), во Кина и во Европа во првиот квартал од следната година, под услов да ги добие потребните регулаторни одобренија.
Официјалниот налог на платформата X на „Тесла еј-ај“ (Tesla AI), подружница на производителот на електрични возила, во четвртокот објави план за лансирање на претстојните технологии. Најавата покажува дека „Тесла“ е блиску до добивање дозволи за оваа технологија, која ја гледа како можност за зголемување на продажбата и одржување предност во однос на кинеските конкуренти, кои исто така развиваат слични системи за асистенција на возачот.
„Тесла“ постигна значителен напредок во добивањето одобренија за кинескиот пазар, откако успешно ги помина процените за безбедноста на податоците и склучи договор за мапирање и навигација со технолошкиот гигант „Баиду“ (Baidu), пишува „Блумберг“ (Bloomberg).
Компанијата исто така доби дозвола да ја тестира технологијата ФСД (FSD) на улиците во Шангај, објави „Блумберг“ во јуни.
И покрај тоа што извршниот директор Илон Маск ја насочува иднината на „Тесла“ кон развојот на автономното возење, технологијата ФСД сè повеќе е под лупа во САД.
И покрај името на технологијата, „Тесла“ и експертите од индустријата велат дека возачите мора да ги држат рацете на воланот и да внимаваат на патот додека го користат овој софтвер.
Маск на конференциска врска во јули рече дека очекува системот ФСД да биде одобрен во Европа, Кина и други земји до крајот на годината. Тој исто така на X во април напиша дека воведувањето во Кина може да се случи многу наскоро.
Ако ФСД биде одобрен, тоа би можело да му помогне на производителот на електрични возила да го задржи своето водство во Кина, неговиот најголем пазар во странство, каде што десетици бренда го намалуваат пазарниот удел на „Тесла“ и развиваат своја напредна технологија за помош на возачот.
Според податоците на кинеската асоцијација на производители на патнички автомобили, испораките на „Тесла“ во Кина во првите осум месеци од годинава паднале за околу шест отсто во споредба со минатата година.
.webp){kind=icon}