„Мол груп“ оствари два отсто помалку приходи од продажба во четвртиот квартал од 2024 година, додека ЕБИТДА беше за 5 процентни поени помала. Најнегативно влијание врз резултатите имаа сегментите преработка и дистрибуција од една страна и истражување и производство од друга страна, што беше делумно ублажено со позитивниот раст во сегментот на потрошувачки услуги.
Сегментот за преработка и дистрибуција забележа раст од 3 отсто во делот на преработка на сурова нафта во споредба со 2023 година, но падот од околу 70 отсто на маржите на рафинирање во истиот период предизвика полош финансиски резултат.
Во четвртиот квартал, сегментот за истражување и производство произведе 1 отсто повеќе илјади барели нафтен еквивалент дневно (mboed) во споредба со истиот квартал минатата година. Производството во Унгарија, која има најголем удел во целокупното производство, е зголемено за 5 отсто. Сепак, падот на цените на јаглеводородите влијаеше на резултатите на сегментот, што резултираше со помала ЕБИТДА по барел нафтен еквивалент за 3 проценти.
Маржата што не се однесува на горивото останува главен двигател на растот во сегментот на услуги за потрошувачите, додека продажбата на гориво имаше мал позитивен придонес.
Иако капиталните расходи (CAPEX) на компанијата останаа непроменети во споредба со 2023 година, во последниот квартал од 2024 година органскиот CAPEX беше понизок за 50 милиони евра, што групацијата го надомести сп преземање фотоволтаичен парк во Унгарија, што е дел од стратегијата за диверзификација кон обновливите извори на енергија. Сегментот за преработка и дистрибуција продолжува да доминира во капиталните инвестиции. Вкупно 78 проценти од CAPEX беа доделени за активности за одржување.
Вкупниот долг се зголеми за 12 отсто во четвртиот квартал од 2024 година. Истовремено, МОЛ го заврши периодот со 5 отсто повисоки резерви на готовина и парични еквиваленти. На крајот на кварталот, коефициентот на нето-долгот спрема ЕБИТДА изнесуваше 0,68, што е за 19 отсто повисоко отколку во 2023 година.
Акциите на MОЛ пораснаа од почетокот на 2025 година до средината на февруари, по што благо паднаа. Тој тренд продолжи и по објавувањето на резултатите за четвртиот квартал од 2024 година, при што цената падна на 7,24 евра.
Компанијата во наредниот период очекува стабилно производство и мал пораст на преработката на деривати, што би значело дека нејзините финансиски резултати ќе зависат од цената на нафтата, маржите на рафинериите и побарувачката. Во првите три месеци од 2025 година цената на брентот се очекува да остане стабилна на околу 70 долари, а негативниот притисок од маржата за рафинирање се очекува да продолжи врз ЕБИТДА на компанијата. Економскиот раст на Европа, кој ќе има значително влијание врз побарувачката, е доведен во прашање поради потенцијалното воведување царини од страна на САД. Групацијата МОЛ ќе има можност да го зголеми својот удел на српскиот пазар поради потенцијалните санкции кон НИС, што би имало ограничено позитивно влијание врз приходите. Компанијата претходно најави можност за удвојување на испораката на нафтени деривати во Србија, а на 24 февруари потпиша договор со „Јадранска нафта“ (ЈАНАФ) за транспорт на 2,10 милиони тони нафта до крајот на 2025 година и договор за складирање нафта на терминалите Омишаљ и Сисак до 2027 година.
.webp){kind=icon}
