Политичарите на берза - пет вести на денот

Сè уште не е јасно каков протокол ФИФА ќе применува во врска со екстремните горештини на претстојното Светско првенство во САД, Мексико и Канада. Засега организацијата најави пауза за хидратација од три минути во секое полувреме, без оглед на температурата. 

За време на минатогодишното клупско Светско првенство, ФИФА дозволи дополнителни паузи за разладување само кога температурата на термометарот достигнуваше 28 Целзиусови степени, и тоа по интервенција на Меѓународниот сојуз на професионални фудбалери. Но ниту една од овие мерки, според критичарите, не е доволна.

Добро утро! Ова се петте вести што треба да ги знаете на почетокот на денот, во избор на дигиталната редакција на „Блумберг Адрија“ од Скопје.

Во кои акции инвестираат семејствата на македонските политичари

Податоците за имотната состојба на македонските политичари откриваат дека тие главно вложуваат во недвижности - станови, куќи, земјоделско, градежно земјиште... На пријавените анкетни листови има од сѐ по нешто.

Љубители се и на автомобили, некои пријавиле и оружје, скапоцен накит, вредни уметнички дела. Најчесто штедат во банка, а најголем дел од нив има и долгови. Ние одлучивме да провериме кој од именуваните функционери вложува во хартии од вредност. Во време кога пазарите се соочуваат со турбуленции, но носат и значајна заработка во последните години, разгледавме кој има чувство за долгорочна заработка, но и кој верува во домашниот пазар на капитал. 

Што покажува споредбата на „Гранит“ со европските конкуренти?

Кога зборуваме за градежниот сектор во Македонија, едно од првите имиња што им паѓа на ум на инвеститорите е „Гранит“ АД Скопје. Таа е една од најголемите и најстарите градежни компании во земјата, чии корени датираат од 1952 година. Низ децениите „Гранит“ прерасна од локален градежен субјект во регионална компанија која сега работи на неколку пазари во Југоисточна Европа.

Една од спецификите на „Гранит“ е нејзиното релативно високо ниво на вертикална интеграција. Компанијата со години развива сопствена производствена мрежа за да ја намали зависноста од надворешни добавувачи и да обезбеди клучни градежни суровини. Денес, има девет бетонски фабрики, седум асфалтни бази, седум каменоломи и вкупно 11 производствени погони, што ѝ овозможува на компанијата да има поголема контрола врз трошоците и синџирот на снабдување.

Кина се закани одмазда ако ЕУ воведе трговски ограничувања

Кина предупреди дека „решително“ ќе возврати доколку Европската Унија продолжи со нови рестриктивни трговски мерки, по дискусијата на Европската комисија за политиката кон Кина на 29 мај.

„Доколку ЕУ инсистира на еднострано воведување нови трговски инструменти и наметнување дискриминаторски ограничувања, Кина решително ќе преземе контрамерки и ќе усвои ефикасни постапки за заштита на сопствените интереси“, се вели во соопштението на Министерството за трговија.

Ова следува по прелиминарните состаноци што во петокот ги одржа Европската комисија, која се занимава со трговски прашања на ЕУ, за да разговара за тоа како да се справи со зголемената економска конкуренција од Кина, вклучително и напливот од производи што поткопа бројни европски индустрии.

Нафтениот шок од Иран ја менува стратегијата на ЕУ кон Русија

Европската Унија разгледува привремено замрзнување на ценовната граница за руската нафта додека војната на Блискиот Исток продолжува и во четвртиот месец, изјавија лица запознаени со прашањето.

Цените на нафтата нагло пораснаа како резултат на војната со Иран и ефективното затворање на Ормускиот Теснец. Следната ревизија на ценовната граница во јули најверојатно би довела до зголемување на нивото на најмалку 65 долари, што е повисоко од претходниот праг од 60 долари што колективно го постави Групата седум (Г7), изјавија упатените извори кои зборувале под услов на анонимност.

Замрзнувањето би ја задржало ценовната граница на сегашното ниво. Други опции што се разгледуваат вклучуваат суспендирање на динамичните и автоматските зголемувања до крајот на годината поради исклучителните околности на Блискиот Исток или ограничување на секое зголемување на 60 долари, повторно усогласено со нивото на Г7, посочија тие.

Како ќе изгледа новата Сири?

Долго очекуваниот ремонт на Сири (Siri) на „Епл“ (Apple) треба да стане централен дел од следните ажурирања на софтверот за ајфон, ајпад и мек уреди, а „Блумберг њуз“ нуди прв поглед на тоа како ќе изгледа новиот дигитален асистент.

Илустрациите изработени од „Блумберг“ (Bloomberg) прикажуваат преработен интерфејс за Сири, нова апликација во стил на четбот и други големи промени во системот иОС 27 (iOS 27) што компанијата планира да ги објави на 8 јуни на својата Светска конференција за програмери (WWDC). Сликите се засноваат на информации во кои „Блумберг“ имал увид и на изјави на луѓе запознаени со плановите на компанијата, кои побарале да останат анонимни бидејќи софтверот сè уште не е јавен.

Како да купите крипто?

 Криптото повеќе не е резервирано само за експерти. Денес постојат неколку едноставни начини за пристап до пазарот. Еден од начините за купување крипто денес е преку финтек-сервиси базирани на блокчејн-технологија.

 Дознајте како функционираат криптопазарите, блокчејнот и дигиталните средства преку Блумберг Адрија Крипто едукација. ДОЗНАЈТЕ ПОВЕЌЕ.