Пад на акциите поради Ормускиот Теснец, нафтата и приносите растат

Обидот за закрепнување на американските акции згасна, додека нафтата и приносите на обврзниците пораснаа поради неизвесноста околу договорот меѓу САД и Иран.

Фјучерсите на S&P 500 паднаа 0,3 отсто, откако резултатите на „Енвидија“ (Nvidia Corp.) не успеаја дополнително да го поттикнат растот поврзан со трговијата со вештачка интелигенција. Брентот поскапе 1,9 отсто, на околу 107 долари за барел. Иранскиот врховен лидер Моџтаба Хаменеи изјави дека земјата мора да го задржи ураниумот збогатен речиси до ниво за производство на оружје, објави „Ројтерс“, што го намали оптимизмот дека завојуваните страни се движат кон договор.

Акциите последните денови се движат меѓу добивки и загуби, бидејќи ефектот од силните корпоративни резултати слабее, а приносите на глобалните обврзници достигнуваат највисоки нивоа во повеќе години. Со растот на стравувањата дека подолг прекин на снабдувањето со нафта би ги натерал централните банки повторно да ги зголемат каматните стапки, берзите повторно зависат од изгледите за траен договор на Блискиот Исток.

„Инвеститорите постојано се оттурнувани како топче во флипер-машина“, изјави Јоаким Клемент, директор за стратегија во „Панмур либерум“ (Panmure Liberum). „Постојаните промени во вестите за Иран не им дозволуваат на акциите да најдат насока, но затоа обврзниците сè повеќе вградуваат очекувања за повисока инфлација.“

Американските државни обврзници ослабеа по целата крива на достасување. Приносот на 10-годишните обврзници порасна за два базични поена, на 4,61 отсто, откако извршниот директор на „ЏП Морган“ (JPMorgan Chase & Co.), Џејми Дајмон, предупреди дека каматните стапки би можеле да пораснат многу повеќе од сегашните нивоа.

Bloomberg

Негативното расположение на американските пазари беше во контраст со силниот оптимизам во Азија, каде што клучен технолошки индекс го забележа најголемиот раст во последните шест недели.

Акциите на „ЛГ електроникс“ (LG Electronics Inc.) и „Хјундаи мобис“ (Hyundai Mobis Co.) силно пораснаа во Сеул, откако извршниот директор на „Енвидија“, Џенсен Хуанг, посочи нови можности во роботиката и автономните возила. „Софтбанк“ (SoftBank Group Corp.) скокна 20 отсто, бидејќи две компании поддржани од јапонскиот инвеститор - „Опен еј-ај“ (OpenAI) и „СБ енерџи“ (SB Energy Corp.) - наводно се подготвуваат за иницијални јавни понуди. Производителите на чипови ги следеа добивките што нивните американски конкуренти ги остварија во средата.

„Растот во Азија е поддржан од многу силен раст во технолошкиот сектор, особено околу актуелната побарувачка за ВИ“, изјави Франциско Симон, шеф за стратегија за Европа во „Сантандер“ (Santander Asset Management). „Инвеститорите и понатаму гледаат структурен потенцијал за раст поврзан со идниот развој на ВИ, вклучувајќи и компании што би можеле да се појават како лидери.“

Акциите на „Енвидија“ беа речиси непроменети во претпазарното тргување. „Интуит“ (Intuit Inc.) потона 13 отсто, откако софтверската компанија објави дека планира да го намали бројот на вработени за околу 17 отсто. „Тесла“ (Tesla Inc.) порасна 0,9 отсто, откако „Спејс екс“ (SpaceX) на Илон Маск јавно поднесе документација за иницијална јавна понуда.

Истражувањето на вселената ги надминува екосистемите за ВИ

Bloomberg

Инвеститорите внимателно ги следат и податоците за деловната активност во најголемите економии, во услови на растечки трошоци за енергија. Податоците на „Ес енд Пи“ (S&P Global) се сметаат за важен првичен показател за трендовите и можните пресврти во економијата.

Во Велика Британија компаниите го забележаа првиот пад на производството по повеќе од една година, бидејќи шокот од Иран и растечкото незадоволство против премиерот Кир Стармер негативно влијаеја врз услужниот сектор. Во еврозоната економската активност се намали со најбрзо темпо во последните две и пол години.

Корпорациски вести:

„Волмарт“ (Walmart Inc.) оствари уште еден квартал на солиден раст на продажбата, користејќи ја својата големина за да привлече потрошувачи што бараат пониски цени и покрај растечката загриженост за економската нестабилност.

„Авалонбеј“ (AvalonBay Communities Inc.) и „Еквити“ (Equity Residential) се согласија на спојување преку размена на акции, со што ќе се обединат два од најголемите инвестициски фондови за станбени недвижности.

„Спејс екс“ (SpaceX) јавно поднесе документи за иницијална јавна понуда што би можела да биде најголема досега, откривајќи милијарди долари загуби и структура на акции што ќе му овозможи на Илон Маск да ја задржи контролата врз компанијата.

„Опен еј-ај“ (OpenAI) се подготвува во наредните недели да поднесе барање за иницијална јавна понуда и планира берзанско деби наесен, според лице запознаено со плановите.

„Самсунг електроникс“ (Samsung Electronics Co.) би можел годинава да исплати околу 40 билиони вони, односно 26,6 милијарди долари, бонуси за вработените во секторот за чипови, откако компанијата во последен момент постигна договор со синдикатите и избегна штрајк.

Извршниот директор на „ЏП Морган“, Џејми Дајмон, изјави дека банката веројатно ќе вработува повеќе специјалисти за вештачка интелигенција и помалку традиционални банкари, бидејќи примената на технологијата забрзано расте.

„Интуит“ (Intuit Inc.) отпушта околу 17 отсто од вработените, или приближно 3.000 лица, како дел од мерките за намалување на трошоците додека компанијата инвестира во производи базирани на вештачка интелигенција.