„Трамп сакаше да ги заштити американските компании и Волстрит со царини и геополитички договори, но засега излегува дека профитираат пазарите во развој и Европа - барем што се однесува до пазарите на капитал“, велат анаитичарите на „Блумберг Адрија“, Михаел Блажековиќ и Марина Петров Савиќ, во својата анализа за влијанието на американскиот претседател врз пазарите на капитал. Речиси никој не знае со сигурност како ќе се движат пазарите до крајот на годината, бидејќи засега сè зависи од потезите на еден човек, велат тие.
Скапоцени метали – Влијанието на Трамп е индиректно, глобалната несигурност е фактор број еден
Цените на златото и среброто имаа многу успешна 2024 година (+27 проценти и +22 отсто, соодветно), а во 2025 година трендот забрза. Освен влијанието на специфичните фактори на побарувачката – враќањето на кинеската централна банка како значаен купувач на злато и зголемената побарувачка за накит во Индија – една од клучните функции на златото останува неговата улога на безбедно засолниште (анг. safe-haven), но и средство за зачувување на вредноста, односно заштита од инфлација. Враќањето на Трамп на власт и самото исчекување на тоа беа дополнителни фактори кои ја зголемија побарувачката за благородни метали.
„Во периодот околу и веднаш по изборите во САД бевме сведоци на стагнација бидејќи побарувачката за злато беше под притисок на зајакнувањето и очекувањата за натамошно зајакнување на доларот. Меѓутоа, таа фаза не траеше долго. Воведувањето на протекционистички мерки и зголемените трговски тензии, како и придружните очекувања за пораст на инфлацијата, обезбедија континуиран позитивен тренд за златото во последните два месеца. Во последната недела од февруари дури забележуваме мала корекција како резултат на реализацијата на профитот од страна на дел од инвеститорите, но и моменталната неизвесност во врска со натамошната насока на американската монетарна политика во пресрет на објавувањето на податоците за инфлацијата“, велат аналитичарите.
Среброто го следи патот на златото, но со поголема нестабилност и нешто побавен раст на цените, бидејќи неговата индустриска примена во секторите поврзани со зелената транзиција е доведена во прашање поради пристапот на Трамп кон таа тема.
Американскиот долар го промени својот тренд и паѓа во однос на светските валути
Во последното тримесечје лани, периодот околу изборите во САД, доларот постојано го следеше позитивен тренд и покрај тоа што Трамп често нагласува дека претерано силниот долар не е во интерес на американската економија. Меѓутоа, економскиот раст на САД го надминува тој на еврозоната, монетарната политика на Фед е во фаза „повисоко за подолго“ (анг. higher for longer), додека ЕЦБ има простор за дополнително намалување на каматните стапки, што ги зголемува очекувањата за разликата во каматните стапки и оди во прилог на зајакнување на американскиот долар. На ова треба да се додадат и политичките превирања во ЕУ, кои ја намалуваат атрактивноста на овој пазар.
Од средината на јануари доларот го промени трендот и ги избриша своите добивки од претходниот месец, па така на крајот на февруари индексот на доларот (DXY – композитна вредност на доларот во однос на најголемите светски валути) беше на ниво од средината на декември. Загриженоста за натамошниот раст на САД, како и за последиците од царините на Трамп на домашниот пазар, го намалија притисокот за јакнење на валутата.
„Движењето МЕГА (MEGA - Make Europe Great Again) сè почесто се споменува меѓу инвеститорите, кои сè повеќе го насочуваат своето внимание кон европските берзи. Причината за тоа се очекувањата за посилни фискални трошења во рамките на ЕУ, посилен ангажман во врска со Украина, како и поголеми инвестиции во развојот на вештачката интелигенција“, потенцираат нашите аналитичари.
Според нив, посебен замав добива и одбранбениот сектор, а европските градежни компании би можеле значително да профитираат од идната обнова на Украина. „Во фундаментална смисла, европските акции се сè уште потценети во однос на американските, делумно поради помалиот удел на технолошките компании, но и поради претходната незаинтересираност на инвеститорите (P/E 15X, EV/EBITDA 9.9X). Тромавоста на европската економија и разликите меѓу членките на ЕУ дополнително го кочат растот. Меѓутоа, парадоксално, токму Доналд Трамп одигра клучна улога во зајакнувањето на европското единство. Резултатот од тоа? Европските берзански индекси сега ги надминуваат американските“, велат аналитичарите.
Истовремено, најавените царини на Трамп за Мексико првично го потресоа тамошниот пазар, но подоцна беа ублажени откако стана јасно дека тие ќе се применуваат селективно. Пазарите во развој исто така бележат раст, најмногу благодарение на силното закрепнување на кинеските берзански индекси. Кина и Тајван заедно сочинуваат дури 48 отсто од тој сегмент, а инвеститорите проценија дека мноштвото негативни фактори веќе се вкалкулирани во цените на акциите. Тој оптимизам, според нашите аналитичари, го поттикна кинескиот пазар, кој во изминатата година постигна раст од дури 40 отсто.
.webp){kind=icon}
