Лов на Руси кои продавале уметнички дела и ги кршеле санкциите

Американците се свртеа кон светот на уметноста поведувајќи истрага за прекршителите на трговските санкции. Властите се фокусираа на уметност купена или продадена од многу богатите руски тајкуни.

Со серија судски наредби, федералните обвинители во Њујорк бараат големите американски аукциски куќи да ги предадат долгогодишните записи за да утврдат дали уметничките дела биле шверцувани во странство или дали приходите од продажба биле незаконски пренасочени, изјави извор запознаен со ова прашање.

Поканите се испратени до санкционирани руски тајкуни како Андреј Мелниченко, Виктор Векселберг и Роман Абрамович и украинскиот милијардер Ихор Коломојски, вели лицето кое побара анонимност бидејќи информациите сè уште не се објавени. Бараната информација ги опфаќа сите претходни трансакции на аукциските куќи со споменатите лица, вели извор кој не откри на кои фирми им била доставена поканата.

Од главните аукциски куќи со кои контактираше „Блумберг“, од „Кристи интернешенел“ велат дека тие „соработуваат и целосно го почитуваат законот“. Од аукциската куќа „Филипс“ коментираат дека има мерки „за да се осигура дека ниту еден поединец или институција кои се цел на санкциите не може да работи директно или индиректно преку нивните салони“. Од аукциската куќа „Сотби“ не одговорија веднаш на барањата за коментар.

Од руската инвазија врз Украина, САД ги проширија санкциите насочени кон руските бизнисмени и компании поврзани со Владимир Путин. Ова доведе до заплена на луксузни средства, од јахта во јужниот дел на Пацификот до уметност во француска галерија. Американското Министерство за правда, исто така, планира да заплени куќа во Гринич Вилиџ поврзана со рускиот милијардер Олег Дерипаска.

Истражувајќи ги аукциските куќи, одделот се обидува да пронајде „професионални прекршители на санкции“, односно луѓе кои им помагаат на богатите да избегнат ограничувања и да перат пари. Овој месец, обвинителите обвинија двајца мажи, вклучително и поранешен специјален агент на ФБИ, за помагање на Дерипаска и кршење на санкциите.

Перење на пари

Жорж Ледерман, адвокат специјализиран за уметнички злосторства и одземање имот, вели дека истрагата е резултат на координацијата меѓу Канцеларијата за контрола на странски средства на Министерството за финансии на САД, која го надгледува списокот со санкции, и обвинителите, кои се обидуваат да спречат перење пари.

„Претходно, ако прекршивте санкција, ќе добиевте голема парична казна и тогаш ќе требаше да спроведете пософистицирана програма за спречување на перење пари“, рече Ледерман. „Сепак, сега поради санкциите против Русија и зголемената свест, има повеќе гонења за перење пари“.

Во последниве месеци, обвинителите во Менхетен го намалија фокусот на нивните истраги, разгледувајќи конкретни уметнички дела купени пред години, како и некои недвижности, вели изворот. Истрагата ја водат американското обвинителство во јужниот округ на Њујорк и федералната работна група формирана за следење на руските санкции. Портпаролот на работната група одби да коментира.

Моне од 50 милиони долари

Рускиот тајкун Мелниченко, чие богатство се проценува на 12,7 милијарди долари според индексот на милијардери на „Блумберг“, наводно ја купил „Le Bassin aux Nymphéas“ од Моне во 2009 година за 40,9 милиони фунти (49,6 милиони долари). Абрамович е вториот најголем производител на челик во Русија и поранешен сопственик на лондонскиот фудбалски клуб Челзи. Неговата поранешна сопруга, Дарја Жукова, била колекционер на уметнички дела.

Главниот обвинител на федералната работна група, Ендрју Адамс, изјави пред Адвокатската комора на Њујорк во ноември дека неговиот тим е фокусиран на наоѓање такви средства пред нивните сопственици да ги префрлат во други јурисдикции.

Наводниот помошник на Русите бил британскиот бизнисмен Греам Бонам-Картер, кој во октомври беше обвинет за обид за пренесување уметност што припаѓа на санкционираниот Дерипаска. Дерипаска купил 18 уметнички дела на аукција во Њујорк во 2008 година, една деценија пред да биде осуден, се вели во обвинението. Уметничките дела се чувале во складиште во Њујорк се додека Бонам-Картер наводно не се обидел да ги изнесе од земјата во 2021 година.

Бонам-Картер се бори против екстрадиција од Обединетото Кралство во САД, каде се очекува да се соочи со обвиненија.

Пред објавувањето на извештајот на Сенатот за 2020 година за избегнување санкции од светот на уметноста, големите аукциски куќи и приватните продавачи почнаа да вклучуваат како стандарден услов во договорите дека купувачот или продавачот не смеат да бидат казнети или вклучени во криминални активности, рече Томас Данцигер адвокат од Њујорк специјализиран за уметничко право.

Водечките аукциски куќи спроведоа доброволни програми против перење пари, но тоа можеби не е доволно за да ги спречи вистинските сопственици на уметнички дела да се засолнат зад мрежите на корпоративните структури или роднините.

„Банкарот на Путин веројатно нема да влезе во галерија на авенијата Медисон и за да го купи Пикасо“, рече Данцигер.