Трамп го одбил иранскиот предлог, акциите веднаш паднаа

Обновениот раст на нафтата ги турна акциите и обврзниците надолу поради стравувањата дека продолжено затворање на Ормускиот теснец ќе ја поттикне инфлацијата и ќе ја ослаби глобалната економија.

Акциите ги продлабочија загубите, а Брент надмина 118 долари откако „Аксиос“ објави дека претседателот Доналд Трамп ќе го држи Иран под поморска блокада сè додека не прифати договор што ќе одговори на загриженоста околу неговата нуклеарна програма. Приносите на 10-годишните американски обврзници се искачија на едномесечен максимум од 4,4 отсто. Nasdaq 100 беше подобар од поширокиот пазар во пресрет на резултатите од „Алфабет“ (Alphabet Inc.), „Амазон“ (Amazon.com Inc.), „Мета “ (Meta Platforms Inc.) и „Мајкрософт“ (Microsoft Corp.).

Bloomberg

Трамп разговарал за чекори што САД би можеле да ги преземат за продолжување на блокадата на Иран на средба со раководители од нафтената и трговската индустрија, изјави претставник на Белата куќа. „Волстрит журнал“ објави дека Трамп им наложил на соработниците да подготват план за продолжена блокада на иранските пристаништа.

„Блокадата е донекаде поефикасна од бомбардирањето. Се гушат како натоварена свиња. А за нив ќе биде уште полошо. Не можат да имаат нуклеарно оружје“, изјавил Трамп во телефонско интервју во средата, според „Аксиос“.

Скокот на цените на енергенсите и нарушувањето на синџирите на снабдување поради војната ја зголемија можноста претставниците на Федералните резерви да останат во режим на чекање и набљудување. Трговците речиси целосно се откажаа од обложувањата за намалување на каматите оваа година и почнаа да ја вградуваат можноста за зголемување во 2027 година.

Креаторите на политиката ќе го објават соопштението во 14 часот по време во Вашингтон, а прес-конференцијата на Џером Пауел ќе следува 30 минути подоцна.

„Високите цени на нафтата дополнително ги зголемуваат инфлаторните притисоци, ги креваат приносите на државните обврзници и ја усложнуваат политичката слика“, изјави Фиона Чинкота од „Сити индекс“ (City Index). „Тоа создава тешка средина за Фед, кој мора да најде рамнотежа меѓу инфлациските ризици и грижите за растот.“

Нафтата расте додека застојот меѓу САД и Иран се заканува со продолжен шок во снабдувањето

Извор: ICE

„Наглиот раст на цените на нафтата ги надвладеа силните резултати“, изјави Марк Хакет од „Нешнвајд“ (Nationwide). „Моментумот почна да слабее бидејќи силниот поттик од масовното повлекување на инвеститорите на страна попушта, а релативна слабост се гледа кај многу од неодамнешните лидери.“

Поверојатно е дека пазарот влегува во фаза на консолидација наместо во насочено движење, каде извештаите за заработка делуваат како катализатор за поединечни акции, а зголемената нестабилност ја тестира увереноста, додаде тој.

Со оглед дека клучните технолошки компании треба да објават резултати, а нема цврсто решение за Иран, веројатно акциите бараат повод за оправдување на консолидацијата на добивките пред нов раст, наведува Крис Сењек од „Вулф рисрч“ (Wolfe Research).

„Ако трошењето за вештачка интелигенција се зголеми и Фед ги оцени енергетските трошоци како привремени, очекувајте раст. Ако слушнеме претпазливост, може да видиме интересна нестабилност надолу“, изјави ветеранот стратег Луис Навелиер.

Корпорациски вести:

„Сигејт“ (Seagate Technology Holdings Plc) даде прогноза за четвртиот квартал многу посилна од очекувањата. Компанијата објави и резултати за третиот квартал што ги надминаа прогнозите.

„Робинхуд маркетс“ (Robinhood Markets Inc.) пријави нето-приходи за првиот квартал под просечната процена на аналитичарите.

„Авис“ (Avis Budget Group Inc.) објави квартална загуба полоша од очекуваното, утрото по објавата дека голем инвеститор продал дел од уделот, што предизвика турбулентно тргување со акцијата.

„Виза“ (Visa Inc.) порасна откако компанијата објави, како што рекоа аналитичарите, „еден од најчистите“ квартали во последните години.

„Старбакс“ (Starbucks Corp.) објави подобри резултати од очекувањата и соопшти дека сега очекува споредливата продажба да порасне најмалку 5 отсто годинава, наспроти претходната прогноза од 3 отсто или повеќе.

„Букинг“ (Booking Holdings Inc.) ја намали прогнозата за целата година бидејќи туристичката побарувачка трпи поради конфликтот на Блискиот Исток