Фјучерсите на американските акции во пораст, јенот делумно се повлекува

Фјучерсите на берзанските индекси во САД пораснаа, сигнализирајќи дека растот кој ги турна показателите на Волстрит до рекордни нивоа по силните резултати на технолошките гиганти со голема пазарна капитализација може да продолжи. Јенот благо ослабе, намалувајќи дел од зајакнувањето поттикнато од интервенцијата на Јапонија.

Договорите за индексот S&P 500 пораснаа за 0,2 отсто, а оние за Nasdaq 100 за 0,1 отсто, откако основните индекси во четвртокот затворија на историски највисоки нивоа, поддржани од оптимизмот за изгледите на заработките на американските компании. Акциите на „Епл“ (Apple Inc.) пораснаа за речиси 2 отсто во продолженото тргување откако компанијата објави силна прогноза за приходите, иако предупреди на повисоки трошоци за мемориски чипови.

Во меѓувреме, јенот беше благо послаб, на околу 157,25 за долар, откако во четвртокот достигна ниво од 155,57. Валутата се приближуваше до нивото од 161 пред јапонската влада да интервенира со поддршка. Јапонскиот индекс Nikkei порасна за 0,6 отсто, додека неколку азиски пазари беа затворени поради празник.

Трговците имаа многу предизвици во април, бидејќи цените на нафтата нагло пораснаа поради кризата на Блискиот Исток без изгледи за брзо решение, но американските акции го забележаа најдобриот месец од 2020 година, поттикнати од обновениот раст на технолошките акции и трендот поврзан со вештачката интелигенција. Инвеститорите ќе ја тестираат таа приказна во наредните недели, следејќи дали моментумот воден од ВИ може да ги надомести ценовните притисоци и геополитичките ризици.

Извор: Bloomberg

„Сѐ додека економијата продолжува да расте и компаниите успеваат да ги зголемуваат заработките, може да видиме повисоки цени на акциите дури и во услови на повисоки цени на енергенсите и инфлација“, изјави Крис Закарели од „Нортлајт“ (Northlight Asset Management).

Иако бруто-домашниот производ на САД забрза во првиот квартал, благодарение на силниот раст на инвестициите во бизниси поврзани со ВИ, податоците покажаа и дека инфлаторните притисоци нагло се засилиле во март, откако војната поттикна раст на цените на бензинот. Индексот на цени на личната потрошувачка — мерка за инфлација што ја претпочита Фед — порасна за 0,7 отсто минатиот месец, најмногу од 2022 година.

Загриженоста за инфлацијата расте, при што креаторите на политиките во Европската централна банка веројатно ќе ги зголемат каматните стапки на следниот состанок во јуни, освен ако не дојде до позитивни поместувања кај цените на енергенсите и завршување на војната со Иран, според лица запознаени со ситуацијата.

„Инвеститорите ќе следат како Фед ќе се справат со оваа ситуација, со оглед на тоа што новиот претседател со поумерени ставови ќе влезе во, како што изгледа, најподелен комитет во последните децении“, изјави Брет Кенвел од „Еторо“ (eToro).

Што велат стратезите на Блумберг...
 

Нафтениот шок јасно се одразува во делови од девизниот и обврзничкиот пазар, но американските ризични средства се однесуваат како штетата да биде ограничена. Одржливоста на таа динамика станува една од најважните теми на пазарите.

— Мајкл Бол, макро стратег. 

Во други сегменти од пазарот, американската сурова нафта се стабилизираше околу 105,10 долари за барел, по падот во претходната сесија. Претседателот Доналд Трамп изјави дека останува на одлуката за поморска блокада на иранските пристаништа, додека расте загриженоста дека виталниот Ормуски теснец нема да се отвори во скоро време.

Доларот порасна за 0,1 отсто, откако го забележа најлошиот месец од јуни. Американските државни обврзници изгубија дел од добивките од претходната сесија, при што приносот на 10-годишната обврзница се зголеми за два базични поени на 4,39 отсто. Златото се тргуваше околу 4.620 долари за унца.

Во Азија, вниманието беше насочено кон Јапонија и чекорите што властите ќе ги преземат по силниот раст на јенот во претходната сесија. Растот на јенот поттикнат од интервенцијата е во ризик брзо да избледи, што ја зголемува веројатноста Јапонија повторно да интервенира на пазарот за да го поддржи девизниот курс, велат аналитичарите.

Досега, валутата се движеше близу до најниските нивоа во последните четири децении, што носеше ризик од побрза инфлација преку поскапување на увозот — вклучително и веќе скапата нафта.

Ацуши Мимура, највисокиот јапонски функционер за девизни прашања, изјави дека властите ја одржуваат подготвеноста за интервенција на пазарот на фјучерси на сурова нафта, каде што шпекулативните движења влијаат врз валутата. Јапонија исто така започнала дополнително ослободување на националните резерви на нафта, објави „Кјодо“.

„Имајќи ги предвид високите цени на енергенсите, значително негативните реални каматни стапки во Јапонија и побарувачката за долар, Токио не може да очекува траен пад на курсот долар-јен“, изјави Крис Тарнер, глобален раководител за пазари во „ИНГ“ (ING). „Неизвесниот фактор, сепак, е дали американското Министерство за финансии ќе се вклучи.“

Корпорациски вести: 

Профитот на „АНЗ“ (ANZ Group Holdings Ltd.) во првата половина од годината ги надмина очекувањата на аналитичарите, додека главниот извршен директор Нуно Матос продолжува со реорганизацијата на австралиската банка.

„Катерпилар“ (Caterpillar Inc.) објави квартална заработка над очекувањата и ја зголеми долгорочната прогноза за приходите, поттикната од силната продажба на опрема за градежништво и производство на енергија.

„Ели Лили“ (Eli Lilly & Co.) ја зголеми годишната прогноза за продажба и профит, откако побарувачката за лекови против дебелина нагло порасна.

Акциите на „Мастеркард“ (Mastercard Inc.) паднаа, откако компанијата предупреди дека растот на трошењето во странство преку нејзините картички ослабел.

Првата пресметка за надоместокот на Илон Маск по одобрувањето на неговиот амбициозен пакет за наградување од страна на акционерите на „Тесла“ (Tesla Inc.) изнесува 158 милијарди долари.

Главната финансиска директорка на „Опен еј-ај“ (OpenAI), Сара Фрајар, отфрлајќи ги загриженостите за недостиг од исполнување на внатрешните цели, изјави дека компанијата ги постигнува целите и гледа „вертикален ѕид од побарувачка“ за своите производи.

Некои од главните движења на пазарите:

Акции
 

Фјучерсите на S&P 500 пораснаа за 0,2 отсто во 6:51 часот по лондонско време
Фјучерсите на Nasdaq 100 пораснаа за 0,1 отсто
Индексот MSCI Asia Pacific порасна за 0,2 отсто
Јапонскиот Topix порасна за 0,2 отсто
Австралискиот S&P/ASX 200 порасна за 0,7 отсто

 

Валути
 

Индексот Bloomberg Dollar Spot порасна за 0,1 отсто
Еврото речиси непроменето на 1,1725 долари
Јапонскиот јен ослабе за 0,4 отсто на 157,24 за долар
Офшор јуанот речиси непроменет на 6,8340 за долар
Британската фунта речиси непроменета на 1,3592 долари

 

Криптовалути
 

Биткоин порасна за 0,8 отсто на 77.110,38 долари
Етер порасна за 0,9 отсто на 2.284,84 долари

 

Обврзници
 

Приносот на 10-годишните американски обврзници порасна за два базични поени на 4,39 отсто
Јапонскиот 10-годишен принос се намали за 1,5 базични поени на 2,500 отсто
Австралискиот 10-годишен принос се намали за четири базични поени на 5,02 отсто

 

Суровини
 

Спот-златото падна за 0,1 отсто на 4.611,53 долари за унца
Суровата нафта Вест Тексас речиси непроменета