Само неколку акции го креваат S&P 500, на Волстрит ги потсетува на дот-ком балонот

Забрзаниот раст на американските берзи кон нов историски максимум е поттикнат од толку малку акции што потсетува некои аналитичари на Волстрит на трката што доведе до дот-ком балонот своевремено.

Четири од последните пет рекордни дневни вредности за индексот S&P 500 се случија дури и кога оние акции што загубиле од вредноста беа побројни од добитниците. Во месец април, само 23 отсто од членките на S&P 500 го победија индексот, што стратезите на „Банката на Америка“ (BofA Global Research) велат дека е четвртото најниско месечно отчитување во базата на податоци на банката што датира од 1986 година.

„Не мешајте го овој раст стеснет во неколку акции во моменти на историски највисоки нивоа со широк зелен бран“, рече Марк Малек, главен инвестициски директор во „Мјуриел Сиберт“ (Muriel Siebert & Co.), во изјава за „Блумберг“. Тој го нарече растот „вознемирувачки тесен“ и рече дека ширината паднала „на едно од најтесните нивоа во последните децении надвор од дот-ком балонот“.

Растот на заработката во  секторот процесори и кај компаниите со мега- капитализација, како што е „Алфабет“, матичната компанија на „Гугл“, ги подигна бенчмарк индексите, но овие историски максимуми се погодени само со „врвот на копјето“, рече Малек, осврнувајќи се на малата група имиња поврзани со вештачката интелигенција.

 

Bloomberg

 

Тој не е осамен во овие коментари. Недостигот на ширина зад новите берзански рекорди предизвикува загриженост на Волстрит.

Медијалниот член на индексот останува на 13 отсто под својот соодветен максимум, што е „најниско ниво од дот-ком балонот, освен еден краток период средината на 2023 година“, напиша Бен Снајдер, главен стратег за американски акции во „Голдман Сакс“, во белешка од 30 април.

Тој рече дека стеснетоста на растот на пазарот одразува сличен тенок сет на надградби на проценките за заработката на S&P 500, што го водеа компаниите за микрочипови, технологија и комуникациски услуги. „Енвидија“, на пример, беше одговорна за повеќе од 10 отсто од добивките на S&P 500 во април. Неколку помали компании за чипови беа најдобрите - вклучувајќи ги „Интел“ (Intel Corp.), „АМД“ (Advanced Micro Devices) и „Оу Ен Семикондактор“ (ON Semiconductor).

Сепак, историски гледано, лошата широчина била загрижувачки знак за референтниот индекс.

„Наглото стеснување на ширината историски укажува на ризик од пад на пазарот на акции“, напиша Снајдер. Од 1980 година, просечниот 12-месечен пад по нагло опаѓање на ширината е 10 отсто за S&P 500, според анализата на банката.

Честите ротации на директори кај американските компании- од технолошки до одбранбен сектор,  па преку енергија  сега назад до технологија - „спречија сеопфатно циклично закрепнување“, напиша Роб Андерсон, американски секторски стратег во „Нед Дејвис Рисрч“ (Ned Davis Research), во белешка од 30 април.

Во прилог  на загриженоста околу ширината, Андерсон истакна дека само шест од 11-те сектори на S&P 500 се во рамките на 5 отсто од нивните рекордно високи нивоа.

„Видовте многу работи како едноставно се прпелкаат или малку растат, а потоа технологијата и микрочиповите многу пораснаа“, рече Џонатан Крински, главен пазарен техничар во „БТИГ“ (BTIG LLC), за „Блумберг“.

Само технологијата, комуникациските услуги (благодарение на „Алфабет“, матичната компанија на „Гугл“) и недвижностите се вратија на рекордно високи нивоа, додека остатокот од пазарот се бори да ги стигне. Дури и енергетскиот сектор е под високите нивоа што ги достигна пред прекинот на огнот во војната со Иран.

Проблемот со ширината  не е само привлекување внимание на американскиот пазар, иако не сите се загрижени за тоа. Закрепнувањето на глобалните акции од нивните најниски нивоа во војната со Иран е толку слабо што пазарот е спремен и за позначаен раст  предизвикан дури и од малку позитивни вести, според стратезите во „ЏП Морган“ предводени од Мислав Матејка.

Сепак, во една друга паралела со дот-ком ерата, само 53 отсто од компаниите на S&P 500 тргуваат над нивните 200-дневни подвижни просеци. Крински вели дека тоа е низок процент на пазар кој се зголемил за повеќе од 12 отсто во 23 сесии и се споредува со слични скокови од 1999 и 2000 година.

„Не мислиме дека ова е како во 2000 година, но секако сликата за ширината во рамките на индексот е послаба од она што ‘биковите’ би сакале да го видат“, рече Крински.

Очигледната разлика помеѓу сегашниот пазар и дот-ком ерата е корпоративната добивка, според Малек од „Мјуриел Сиберт“. Денешните лидери на пазарот се исто така компаниите што објавуваат најостар раст на профитот. „Не е како Pets.com“, рече тој, осврнувајќи се на познатата акција на компанијата без профит од дот-ком ерата.

Сепак, рече тој, комбинацијата од мала ширина и брз раст го направиле значително поселективен во врска со тоа кои акции сака да ги купи на пазар каде што вреднувањата повторно изгледаат растегнати. „Постојат некои интересни паралели што се појавија неодамна и ме тераат да размислувам повеќе за дот-ком меурот“, рече тој. „Тоа изгледа како познато ниво на меури што сум го видел во моето искуство на Волстрит.“

 

-Со помош на Џес Ментон.