Грми на берзите: Еврото на најниско ниво по 20, фунтата по 37 години

На светските берзи инвеститорите се загрижени поради рецесијата, додека Европа и натаму ја тресат високите цени на енергијата. Неделата ја одбележаа централните банки кои една по друга повлекоа „рачна“ и ги зголемија каматните стапки. Заедно со американската централна банка (ФЕД), која ги зголеми клучните каматни стапки за 75 базични поени, тоа го направија и централните банки во Велика Британија, Шведска, Швајцарија, Норвешка и други земји. Шведската централна банка ги зголеми каматните стапки за цели 100 базични поени.

Дополнителна тежина за европските берзи се неделните парламентарни избори во Италија. Според анкетите, најдобро котира партијата „Браќа на Италија“на Џорџија Мелони, која е помалку наклонета кон Европската унија од претходните италијански влади. Затоа инвеститорите треба да бидат подготвени за флуктуации на цените, особено во приносите на италијанските државни обврзници. Европските берзи изгубија околу два отсто од својата вредност само во петокот.

DAX изгуби повеќе од една петтина од почетокот на годината

Индексот Eurostoxx 50 на најважните компании во еврозоната загуби 78,54 поени или 2,29 отсто, на 3.348,6 поени. Германскиот индекс Dax загуби 247,44 поени или 1,97 отсто и се лизна на 12.284,19 поени. Ова е најниската вредност од ноември 2020 година. Германскиот индекс веќе изгуби 22 отсто од својата вредност од почетокот на годината.

Францускиот индекс CAC 40 изгуби 135,09 поени, или 2,28 отсто и во петокот падна на 5.783,41 поени. На островот, берзанскиот индекс FTSE 100 загуби 140,92 поени, односно 1,97 отсто и падна на 7.018,6 поени. Новата британска влада го намали данокот на доход во обид да ја поттикне економијата и да ја спречи рецесијата. Британската централна банка (Bank of England) проценува дека тaa е веќе започнатa. Британската фунта падна на најниското ниво од 1985 година и се лизна под границата од 1,1 долар по најавата за намалување на даноците.

Еврото на минимум во последните 20 години

На еврото не му оди ништо подобро. По слабите економски податоци и високите цени на енергијата, кои сè повеќе ги оптоваруваат компаниите, но и потрошувачите, курсот падна на најниско ниво во последните 20 години. Во петокот вечерта за едно евро требаше околу 0,97 долари, што е најниско од крајот на 2002 година. Европската централна банка (ЕЦБ) ја одреди референтната стапка на 0,98 долари, што значи дека за долар се потребни 1,03 евра.

Dow Jones е најнизок од ноември 2020 година

Лошото расположение се прошири и на американските берзи. Како што растат приносите на државните обврзници, берзанските индекси губат. Индексот S&P 500 на 500-те најголеми американски компании го затвори петокот на 3.693,23 поени, што е за 64,76 поени или 1,72 отсто пониско од четвртокот. Технолошкиот индекс Nasdaq загуби 198,88 поени, што е за 1,80 отсто пониско, а тргувањето го затвори на 10.867,93 поени. Индексот Dow Jones изгуби 486,27 поени или 1,62 отсто во петокот и се лизна на 29.590,41 поени. Dow Jones падна на најниското ниво од ноември 2020 година. За околу 150 поени ја избегна границата која означува почетокот на надолен тренд. Неделава изгуби четири отсто, при што S&P 500 падна за 4,6 отсто, а Nasdaq за 5,1 отсто. Сите три индекси втора недела по ред завршија во негатива. Dow е единствениот од трите главни индекси што сè уште нема статус на мечкин пазар.

Цените на нафтата исто така продолжуваат да се намалуваат. Цената на барел северноморска нафта брент за испорака во ноември падна на 85 долари. Еден барел сурова нафта West Texas Intermediate (WTI) за испорака во ноември падна под 80 долари за прв пат од јануари. Со ова, нафтените берзи се затворија во минус четврта недела по ред.