Производителите на чипови ги надминаа акциите на софтверските компании

Акциите на производителите на полуспроводници скокнаа во вторникот, додека софтверските паднаа, со најголемата разлика меѓу двата потсектори на технолошката индустрија досега.

Philadelphia Stock Exchange Semiconductor Index порасна за 4,5 отсто, додека iShares Expanded Tech-Software Sector, ETФ - фонд што се користи како показател за секторот -падна за 4 отсто. Таа разлика од 8,4 процентни поени е најголема досега, според податоци собрани од „Блумберг“ кои датираат од средината на 2021 година.

Движењето е одраз на тоа како трговијата со вештачка интелигенција се подели, при што производителите на чипови и другата инфраструктура за ВИ нагло растат. Индексот на чипови порасна за повеќе од 90 отсто оваа година.

Иако дневната дивергенција е историска, ваквиот тип тргување стана чест оваа година. Ова е четврта сесија во 2026 година со разлика од најмалку 6,5 процентни поени во корист на производителите на чипови. Минатата година имаше една таква сесија; претходно последен пат тоа се случило во 2001 година.

Растот во вторник дојде откако „Алфабет“ објави дека собира 80 милијарди долари преку пакет понуди за акции за финансирање на своите ВИ планови. Потегот нагласи дека големите технолошки компании остануваат посветени на трошење за ВИ. „Бродком“, голем клиент на „Алфабет“, порасна за 3,6 отсто. Одделно, „Марвел технолоџи“ скокна за 26 отсто откако извршниот директор на „Енвидија“ предвиде дека тоа ќе биде следниот бизнис што ќе достигне проценка од 1 билион долари, а во понеделник заврши со проценка од 192 милијарди долари.

Падот кај софтверот следеше по силен период за секторот, вклучувајќи раст од речиси 16 отсто во трите сесии што завршија во понеделникот, што некои го сметаа за „short squeeze“.

И покрај тој неодамнешен раст, секторот е умерено понизок за годинава, бидејќи инвеститорите продолжуваат да се грижат дека понудите од компании родени со ВИ како „Антропик“ или „Опен-еј-ај“ ќе го намалат долгорочниот потенцијал за раст и профитабилност на секторот.

Меѓу позначајните падови во вторник се на „Мајкрософт“ (падна за 3,9 отсто), „Оракл“, за 3,4 отсти, а„Палантир“ изгуби 6,7 отсто.