Европа е многу поголема сила во вештачката интелигенција отколку што повеќето мислат

Европските берзи имаат доволно добитници од вештачката интелигенција за да го надоместат недостигот од технолошки акции.

Европската верзија на трговијата поврзана со ВИ придонесе за изненадувачки силна година за индексот Stoxx 600. Тој успеа да го следи темпото на американскиот S&P 500, иако технолошкиот сектор учествува со само 9 отсто во европскиот индекс, наспроти 44 отсто во американскиот репер. Ова е уште поимпресивно ако се земе предвид поголемата изложеност на Европа на растечките цени на нафтата, како и на побавниот економски раст и растот на корпоративните приходи.

Кошничката на „Ситигруп“ составена од европски компании кои овозможуваат развој на ВИ пораснала за 46 отсто во последната година. Тоа е помалку од растот од 60 отсто кај американските ВИ-компании, но со значително помала нестабилност. Иако производителите на полуспроводници се главните двигатели, Европа има многу повеќе да понуди од неколку директни шампиони во областа на ВИ. Нејзините индустриски сектори се силно поврзани со побарувачката за центри за податоци, а поширокото усвојување на технологијата има потенцијал да ја поттикне следната фаза на ВИ-револуцијата.

Bloomberg Mercury

„Европа е во многу рана фаза од циклусот на усвојување на вештачката интелигенција“, велат стратезите на „Сити“ предводени од Беата Мантеј, посочувајќи ги индустријата, здравството, информатичката технологија, комуникациските услуги и финансискиот сектор како области со најголем потенцијал за придобивки.

„Влијанието врз реалниот БДП и продуктивноста на трудот засега е занемарливо, но постои потенцијал за значителни инвестиции кои ќе го олеснат усвојувањето на ВИ во иднина“, наведуваат тие.

Индустрискиот сектор сочинува една петтина од индексот Stoxx 600, што го прави најголем сектор веднаш по финансискиот. Последната сезона на објавување финансиски резултати потврди дека најголемите европски индустриски компании играат значајна улога во ВИ-бумот.

Најочигледен доказ за тоа доаѓа од компаниите за енергетска инфраструктура. Производителот на електрична опрема „Шнајдер електрик“ и компанијата за индустриска автоматизација АББ пријавија троцифрен раст на побарувачката од центрите за податоци, по што ги зголемија своите деловни прогнози.

Производителот на електрични кабли „Призмијан“ веќе подолго време профитира од потребите за електрификација во Европа и САД, но на сцената се појавуваат и нови добитници. „Кингспан“ силно порасна оваа недела откако ги подобри своите прогнози благодарение на забрзаната изградба на центри за податоци и активностите за преземања и спојувања.

Дури и компании кои претходно се сметаа за потенцијални губитници од ВИ, како што се САП, „Капгемини“ и рекламната агенција „Публицис груп“, пријавија забрзан раст на приходите поврзан со зголемената побарувачка за технологии базирани на вештачка интелигенција.

Силниот раст поттикнат од ВИ доведе до тоа дел од индустриските компании да станат релативно скапи од гледна точка на вреднувањето. Во меѓувреме, последниот бран нестабилност кај акциите на производителите на полуспроводници ги направи инвеститорите повнимателни кон компаниите кои најдиректно имаат корист од капиталните инвестиции во ВИ.

Сепак, одредени акции и понатаму изгледаат атрактивно вреднувани ако се има предвид инвестицискиот циклус за кој се очекува да достигне врв во 2028 година. Аналитичарите на „Барклис“ сметаат дека клучна ќе биде селекцијата на компаниите.

По анализа на околу 500 проекти за центри за податоци, тимот на „Барклис“ како фаворити ги издвојува „Белимо холдинг“ и „Алфа лавал“ во сегментот на системи за ладење, како и „Атлас копко“ и „ВАТ груп“ кои имаат корист од побарувачката поврзана со полуспроводниците.

Кај електротехничките компании со разумни проценки на вредноста, тие ги посочуваат „Шнајдер електрик“ и „Легранд“. Од друга страна, имаат попретпазлив став кон производителите на енергетска опрема „Сименс енерџи“ и „Вартсила“ за кои препорачуваат помала изложеност.

Bloomberg

Анализата на конференциските повици по објавата на финансиските резултати покажува дека придобивките од ВИ се сè порамномерно распределени низ различни сектори.

„Мерливите придобивки од вештачката интелигенција се присутни во повеќе индустрии“, велат стратезите на „Барклис“ предводени од Магеш Кумар Чандрасекаран.

„Особено се издвојуваат намалувањето на трошоците и зголемувањето на ефикасноста како клучни теми, при што компаниите сè почесто известуваат за конкретни и остварени придобивки.“

Европа, според многумина, се наоѓа во поволна позиција. Билансите на компаниите се здрави, а приносите од слободниот паричен тек се значително повисоки отколку во САД. Додека компаниите од индексот S&P 500 се насочени кон големи капитални инвестиции наместо кон откуп на сопствени акции, европските компании располагаат со неколку предности: повисоки приноси за акционерите, помало издавање нови акции, подобри финансиски показатели и значително помала изложеност на ризиците поврзани со нестабилноста на секторот на полуспроводници и конкуренцијата од Кина.

Bloomberg

Иако Европа заостануваше во раните фази на развојот на вештачката интелигенција, тоа не мора да биде негативно, сметаат стратезите на „Голдман“ меѓу кои и Шерон Бел.

Според нив, најважно е Европа да ја искористи можноста за зголемување на продуктивноста што ја нуди ВИ, особено во услови на забрзано стареење на населението. Европа сè уште заостанува во изградбата на центри за податоци и ќе мора значително да инвестира во енергетска инфраструктура за да ги поддржи, што би можело да предизвика долгорочен суперциклус на раст во комуналниот сектор.

„Во минатото сме биле сведоци на технолошки бранови во кои првите иноватори трошеа премногу средства, додека најголема корист на крајот имаа компаниите што умееја да ги искористат тие инвестиции, а не оние што ги финансираа“, заклучуваат тие.