Акциите флуктуираат по значајниот пад на индексот S&P 500

Азиските референтни вредности на акциите утрово флуктуираа, додека фјучерсите на американските акции пораснаа откако индексот S&P 500 ја прекина четиридневната низа загуби, обезбедувајќи на тој начин момент на релаксација во една од најлошите години за акциите и обврзниците во повеќе од една деценија.

 

 

Референтните вредности на капиталот во Јапонија, Кина и Хонгконг се менуваат меѓу загуба и добивка. Австралиските акции рано утрово цврсто пораснаа, а пораст забележуваат и терминските договори за европските акции.

Јенот намали дел од својата добивка по вчерашниот еднодневен скок, најголем од 1998 година, кога порасна речиси за четири проценти во однос на американскиот долар поради ненадејното приспособување на политиката на јапонската централна банка. И натаму одекнува влијанието на јапонскиот монетарен регулатор од одлуката да допушти тргување со приноси на десетгодишни државни обврзници до 0,5 проценти, од претходната горна граница од 0,25 отсто.

Централната банка на Јапонија најави операција за купување обврзници, бидејќи приносот на десетгодишниот долг се приближи кон нова горна граница. Јапонскиот двегодишен државен принос порасна над нулата за првпат од 2015 година. Приносот, пак, од трезорските обврзници исто така благо порасна во Азија, откако претходно скокна за 10 базични бода, и тоа втора последователна сесија по ред.

Трговците се внимателни и поради можноста јапонските институции да ги вратат парите што се држат во странски акции и обврзници. Според податоците на „Блумберг“, јапонските инвеститори имаат повеќе од три илјади милијарди долари во странски акции и друго, од кои приближно половината се во САД.

Движење на приносите од јапонските обврзници / Bloomberg

 

„Строгата политика на централната банка на Јапонија би го оттргнала едно од последните глобални сидра што помогна трошоците на задолжување да се одржат на ниско ниво во поширока смисла“, им велат аналитичарите на „Дојче банк“ (Deutsche Bank AG) на своите клиенти, напоменувајќи дека до промената дојде бидејќи пазарите веќе се потресени од состаноците на ФЕД и ЕЦБ минатата недела.

Многу економисти сега очекуваат дека централната банка на Јапонија ќе ги подигне каматните стапки следната година, придружувајќи им се во тоа на ФЕД, ЕЦБ и другите по децениското извонредно поттикнување.

Во меѓувреме, свежите податоци укажуваат на заладување на пазарот на недвижности во САД во годината што ја обележи брз раст на каматните стапки, кои ги оптоварија акциите и обврзниците. Глобалните акции паднаа за една петтина во 2022 година, во ритамот на нивната најлоша година од 2008-та. Индексот на „Блумберг“ за глобалните акции падна за 16 проценти, што е далеку најголем пад на годишно ниво од почетокот на мерењата од 1990 година.

Во моментов нема коментари за веста. Биди прв да коментира...

Остави коментар