.webp){kind=icon}
Фјучерсите на европските акции паднаа, додека референтните вредности на акциите во Азија се искачија, бидејќи инвеститорите ги анализираат повторното отворање на Кина и внимателните коментари од последниот состанок на банкарите од американските Федералните резерви (ФЕД).
Индексот S&P 500 порасна за 0,8 проценти за време на денешната сесија, додека индексот Nasdaq 100 доби 0,5 проценти на својата вредност. Пораст забележаа и сите поголеми азиски индекси.
Договорите за индексот Euro Stoxx 50 паднаа, што укажува на прв пад во три сесии за референтната вредност за целиот регион. Фјучерсите во САД варираа меѓу добивки и загуби. Акциите на копното и Хонгконг пораснаа потпомогнати од веста дека Кина постепено ќе ја отвори својата граница. Поради тоа, хонконшкиот индекс се искачи на највисокото ниво од јули, сигнализирајќи освежување на апетитите за технолошките акции на копното. Акциите во Јужна Кореја, Јапонија и во Австралија пораснаа.
„Оптимизмот за повторното отворање и политиката за поддршка може да продолжи да го придвижува пазарот засега, но во одреден момент ќе мора да направи пауза за повторно оценување“, рече Веј-Серн Линг, извршен директор во „Унион бенкер“ (Union Bancaire Privee).
Записниците од декемврискиот состанок на ФЕД покажаа дека многу функционери ја истакнале потребата да се запре инфлацијата без премногу да се забавува економијата, од што се охрабруваат некои од инвеститорите. Во меѓувреме, трговците се враќаат на кинеските акции во услови на растечко убедување дека релаксирањето на ограничувањата на вирусот ќе поттикне заживување на потрошувачката и трошењето.
Јенот зајакна во однос на сите негови конкуренти, враќајќи се по вчерашниот пад од 1,2 отсто во однос на доларот. Обврзниците се откажаа од некои од добивките од претходниот ден.
Цената на златото остро порасна откако вчера го достигна највисокото ниво од јуни.
Американските податоци, објавени вчера, покажаа подобрување на условите во синџирот на снабдување, пад на цените на инпутите и побавна побарувачка, сè што ФЕД поздравува. Сепак, „Амазон“ соопшти дека отпушта повеќе од 18.000 работници, значајно поголем број од претходно планираното, што е последен знак дека технолошкиот пад се продлабочува.
„ФЕД сакаше да испрати порака на пазарот дека нема да попушти или да ги намали стапките ниту во еден момент од 2023 година. Меѓутоа, мора да се има на ум дека ФЕД пред 12 месеци не предвиде подигнување на каматните стапки за 400 базични бода, така што нивната способност на предвидувања на сопствените чекори некогаш е доведена во прашање“, рече Џо Гилберт, менаџер за портфолија во „Интегрити“ (Integrity Asset Management).
