Американските индекси во црвено, европските и азиските зелени

Фјучерсите на европските и американските акции пораснаа заедно со големите добивки низ Азија во пресрет на објавата на податоците за американските работни места и инфлацијата во еврозоната, кои ќе помогнат да се трасира патот за натамошното монетарно затегнување од страна на централните банки.

 

 

Договорите за Euro Stoxx 50 и S&P 500 утрово се со добивка, откако американскиот индекс падна за 1,2 отсто во вчерашното тргување. Се зголемија акциите во Јапонија, Јужна Кореја и Австралија. Акциите во Кина и Хонгконг флуктуираа откако првично заздравеа поради вестите дека кинеските власти ќе ги отстранат ограничувањата за задолжување од инвеститори.

Десетгодишните приноси на државните обврзници малку се повлекоа по својата прва добивка во ова неделно тргување, која ја остварија вчера, а главно поради коментарите на претставниците на ФЕД.

Доларот се стабилизира, а јенот падна на најниско неделно ниво откако Банката на Јапонија информира за дополнително непланирано купување обврзници за да ја контролира својата крива на принос.

Генерално, позитивното расположение им претходи на податоците за платите во САД, кои треба да бидат објавени во текот на денов. Процените укажуваат на пад на новите работни места, што укажува на заладување на пазарот на трудот, што, пак, ќе ја намали потребата за повисоки каматни стапки. Сепак, податоците за приватните плати објавени во четвртокот ги надминаа процените, а изненадувачкиот пад на новите барања за надомест за невработеноста ја нагласи стабилноста на пазарот на трудот.

„Она што навистина сака да го види ФЕД е акумулација на пазарите на трудот, со надеж дека ќе може да го направи тоа нежно, без да создаде голем пад. Но моментот нè одведе, во најмала рака, до блага рецесија“, рече Рагурам Рајан, поранешен гувернер на индиската централна банка, во разговор за телевизијата Блумберг.

Пазарните цени за американските каматни стапки, кои ќе го достигнат врвот во јуни, се зголемија на над 5 проценти по коментарите на претседателот на ФЕД на Атланта, Рафаел Бостиќ, кој рече дека централната банка има уште многу работа за да ја скроти инфлацијата. Претседателот на ФЕД Сент Луис, Џејмс Булард, кој повеќе не е член на Федералниот комитет за отворен пазар со право на глас, рече дека стапките се приближуваат до доволно рестриктивната зона и дека инфлациските очекувања се повлекле, нудејќи им на инвеститорите одреден оптимизам.

Има зголемени знаци на притисок врз технолошките компании. „Самсунг“ (Samsung Electronics Co) е последната компанија што извести за пад на побарувачката, што резултира со пад и на оперативната добивка од 69 отсто. Акциите на јужнокорејскиот гигант пораснаа бидејќи се зголемија шпекулациите дека ударот врз заработката ќе ја натера компанијата да ги намали капиталните расходи.

Порастот на фјучерсите на европските акции доаѓа пред податоците за индексот на потрошувачки цени во еврозоната, кои треба да бидат објавени денеска. Консензуалните предвидувања сугерираат дека инфлацијата падна на 9,5 проценти во декември во однос на претходната година, што е намалување од 10,1 отсто, колку што беше забележано во ноември.

Цената на златото се зголеми по повлекувањето во четвртокот од највисокото ниво во последните шест месеци, постигнато во почетокот на неделата.

Во моментов нема коментари за веста. Биди прв да коментира...

Остави коментар