Мешано расположение на берзите, се проценуваат следните чекори на ФЕД

Азиските акции флуктуираа додека трговците проценуваат колку се блиску Федералните резерви (ФЕД) до врвот на каматните стапки по податоците за инфлацијата во САД.

Фјучерсите на американските акции утрово се зголемија, откако и S&P 500 и технолошкиот индекс Nasdaq 100 вчера затворија блиску до најниските нивоа на тргување. Имено, S&P 500 загуби 0,4 отсто од вредноста, а Nasdaq 100 падна за 0,9 проценти. Азиските индекси се главно во негатива до 0,5 проценти.

Валутите на новите пазари во Азија зајакнаа, следејќи ги своите глобални врсници, бидејќи некои инвеститори се обложуваат дека ФЕД само уште еднаш ќе ги зголеми каматните стапки. Инаку, еврото и доларот се тргуваат со сосема мала промена на меѓусебниот курс во однос на вчерашниот ден, односно се на ниво од 1,0991 долар за евро.

Акциите на „Алибаба“ (Alibaba) паднаа бидејќи, како што објави „Фајненшл тајмс“ (Financial Times), „Софтбанк“ (SoftBank Group Corp) го продава поголемиот дел од својот удел во кинескиот технолошки гигант.

„Вестите од 'Софтбанк' може да предизвикаат одреден краткорочен притисок за 'Алибаба', со оглед на тоа што нејзиниот прв поддржувач се повлекува. Некои инвеститори што се оптимисти за планот за реструктурирање на 'Алибаба' може да одберат да купуваат акции откако тие ќе паднат“, рече Стивен Леунг, извршен директор во УОБ (UOB Kay Hian) во Хонгконг.

Податоците за инфлацијата во САД понудија докази и за биковите и за мечките. Додека главната бројка на годишно ниво падна, основните цени се зголемија. Пазарите на свопови покажаа дека шансите сè уште се во корист на зголемување на каматните стапки од страна на ФЕД за четвртина поен во мај, додека трговците ги задржаа своите очекувања дека централната банка ќе ги намали стапките подоцна оваа година.

„Предвремените намалувања всушност ќе бидат предизвик. Не очекувам да видам агресивен циклус на намалување оттука, но сигурно сме на ниво на стапки каде што ФЕД всушност може да паузира по следното покачување“, рече за телевизијата „Блумберг“ Нирај Сет, раководител за азиски кредити во „Блекрок“ (BlackRock Inc) во Сингапур.

Записниците од мартовскиот состанок на ФЕД, објавени вчера, покажаа дека креаторите на политиката ги намалија очекувањата за зголемување на каматните стапки оваа година, откако серијата колапси на банките ги нарушија пазарите. Говорниците на ФЕД испратија мешани пораки, при што претседателката на ФЕД во Сан Франциско, Мери Дејли, рече дека можеби нема да бидат потребни повеќе зголемувања на каматните стапки, додека Томас Баркин од ФЕД Ричмонд рече дека има уште многу пат што треба да се изоди.

 

На другите пазари златото поскапе за 0,2 отсто, искачувајќи се на ниво од 2.018,83 долари за унца.

 

Ниту криптопазарот не се одликува со драстични промени утрово, но кај инвеститорите е присутно позитивно расположение. Биткоинот и етерот ја зголемија својата вредност за 0,4 проценти, така што сега чинат 30.093,41 долар, односно 1.915,49 долари.