Повеќето акции се во пад и покрај позитивните податоци од Кина

Повеќето азиски акции паднаа бидејќи инвеститорите се фокусираа на точките на слабост во економските податоци на Кина, иако целокупната слика беше солидна. Кинеската економија минатиот квартал порасна со побрзо темпо отколку што прогнозираа економистите бидејќи потрошувачите ги зголемија трошоците, но закрепнувањето беше нерамномерно со релативно придушена индустриска активност.

 

 

Утрово индексот S&P 500 порасна за 0,3 отсто, а технолошкиот индекс Nasdaq 100 е променет сосема малку. Акциите во континентална Кина остварија мали добивки, додека тие во Хонгконг, Јужна Кореја и Австралија паднаа за најмногу 0,7 отсто.

Вредноста на доларот беше малку променета, со што забележа дводневна добивка и во однос на европската валута се тргува по курс од 1,0935 долар за евро.

„Повеќето од главните бројки ги надминуваат процените, особено БДП и продажбата на мало, но инвестициите во имот сè уште заостануваат и ги промашуваат очекувањата. Тоа одекнува со поширока загриженост дека закрепнувањето на пазарот на недвижности би можело да биде краткотрајно, бидејќи инвестициите не се зголемуваат“, рече Вилер Чен, висок аналитичар во „Форсит“ (Forsyth Barr Asia Ltd), коментирајќи ги податоците за Кина.

Претседателот на Банката на федерални резерви  (ФЕД) на Ричмонд, Томас Баркин, рече дека сака да види повеќе докази дека американската инфлација се намалува и се враќа назад кон целта на централната банка од два отсто. Производствената активност на државата Њујорк неочекувано се зголеми во април, за првпат по пет месеци, бидејќи се вратија новите нарачки и испораки. Можноста за натамошно затегнување на политиката на ФЕД ги зголеми приносите на државните обврзници и вчера ги ограничи американските акции.

Сепак, приходите на американските банки вчера не ја ублажија целосно нервозата на инвеститорите дека секторот може брзо да закрепне од превирањата и потресите од неколкуте кредитори во почетокот на оваа година, додека во најголемата светска економија се заканува таканаречената рецесија.

На другите пазари, златото ја зголеми својата вредност за 0,2 отсто и сега унца чини 1.999,31 долар.

Позитивна е сликата и на криптопазарот, каде што биткоинот забележа раст од 0,2 отсто и се тргува по цена од 29.518,2 долари, а етерот порасна за 0,3 отсто и чини 2.084,16 долари.