Берзанските индекси во мал пад, слабо расположение за инвестиции

Мерачот на азиските акции падна бидејќи трговците ги одмеруваа приходите од Волстрит, а кинеските акции беа погодени од плановите на акционерите да ги намалат своите удели. Азиско-пацифичкиот индекс MSCI се намали за 0,4 отсто, додека индексот на претпријатијата во Кина падна дури за 1,5 отсто пред да ги намали загубите. Се намалија и фјучерсите за S&P 500 и Nasdaq 100.

 

 

Претседателот на Федералните резерви (ФЕД) на Атланта, Рафаел Бостиќ, изјави за „Си-ен-би-си“ (CNBC) дека се залага за уште едно зголемување на каматните стапки, а потоа нивно задржување над пет проценти некое време за да се спречи инфлацијата. Неговиот колега од Сент Луис, Џејмс Булард, за „Ројтерс“ изјави дека се залага за поставување на стапките во опсег од 5,5 до 5,75 отсто. Референтната вредност моментално се наоѓа меѓу 4,75 и пет проценти.

Инвеститорите се обложуваат дека ФЕД во мај ќе ги зголеми каматните стапки за четвртина поен, а нивното намалување ќе почне да се случува во јули.

„Тоа можеби е премногу рано. Може да има пресврт, можеби кон крајот на оваа година, но не веднаш“, рече Џонатан Лианг, раководител на специјалисти за инвестиции за Азија во „ЏП Морган“ (JPMorgan Asset Management), во рамките на своето гостување на телевизијата „Блумберг“.

Еврото е стабилно и во однос на зелената валута се тргува по курс од 1,0973 американски долари за едно евро. Златото загуби 0,1 отсто од својата вредност, со што унца чини 2.003,01 долар.

Ништо различна не е ниту ситуацијата на криптопазарот. Биткоинот загуби 0,7 отсто од вредноста и се тргува по цена од 30.199,84 долари, додека етерот падна за 0,3 проценти, на 2.086,57 долари.