Берзите се под притисок, се враќа загриженоста за банкарскиот систем

Се чини дека инвеститорите на берзите утрово воопшто не се расположени. Индексот S&P 500 падна за 1,6 отсто, а технолошкиот Nasdaq 100 дури за 1,9 отсто. Паднаа договорите и за европските акции.

 

 

Азиските акции се упатија кон своето најниско затворање за еден месец, погодени од обновената загриженост за глобалната банкарска криза. Меѓу азиските берзански индекси, хонконшкиот е единствениот што е во позитива, со раст од еден отсто, додека сите други се во минус во опсег од 0,1 до 1,2 отсто. Азискиот мерач на капитал падна четврти ден, а финансиските акции се меѓу најголемите губитници.

„Пазарите се многу фокусирани на некои од приказните за заработката, но веројатно ја занемаруваат тежината на економското забавување што се одвива во моментов, особено во Соединетите Американски Држави. Гледам цела низа технички сигнали, кои се чини дека сугерираат средина без ризик“, рече Џон Вудс, главен инвестициски директор за азиско-пацифичкиот регион во „Кредит Суис“ (Credit Suisse Group AG) во гостувањето на телевизијата „Блумберг“.

„Многу од тековните очекувања околу заработката се премногу позитивни, имајќи предвид дека САД сè уште имаат многу пат да поминат за да ја зауздат инфлацијата“, смета Јутинг Шао, макростратег во „Стејт стрит“ (State Street Global Markets) во Хонгконг.

„Боинг“ (Boeing Co.) и „Мета“ (Meta Platforms Inc.) се меѓу компаниите што ќе ја објават својата квартална заработката во текот на денешниот ден.

Еврото и денеска е со мала промена во однос на доларот, иако во континуитет неговата вредност расте. Утрово курсот по кој се тргуваат овие две валути изнесува 1,0975 долар за евро. Златото загуби 0,1 отсто од вредноста и се тргува по цена од 1.995,02 долари за унца.

На криптопазарот се забележува позитивно расположение, за разлика од претходно, па биткоинот ја зголеми својата вредност за 1,2 отсто, со што се искачи на 28.314,56 долари, додека етерот порасна за 0,2 отсто, на 1.864,84 долари.