Азиските индекси паѓаат, американските растат

Азиските берзи го следат падот на американските акции петти ден по ред бидејќи загриженоста за американските регионални банки е поголема од вестите за технолошки приходи, кои се подобри од очекуваното.

 

 

Индексот S&P 500 утрово падна за 0,4 проценти, но технолошкиот индекс Nasdaq 100 ја зголеми вредноста за 0,6 отсто. Европскиот индекс Euro Stoxx 50 падна за 0,3 проценти. И во Азија сликата е различна, така што најголемите берзански индекси се движат меѓу негативната и позитивната зона, со тоа што најголемиот пад изнесува 0,4 проценти, а најголемиот раст 0,3 отсто.

Денешниот раст на фјучерс-договорите за S&P 500 и Nasdaq 100 е последица од позитивните резултати од „Мета“ (Meta Platforms Inc), која ги надмина процените на аналитичарите, зголемувајќи ги своите акции за 11 отсто во тргувањето по работното време. Оптимистичките приходи од „Алфабет“ (Alphabet Inc) и „Мајкрософт“ (Microsoft Corp) вчера го зголемија индексот Nasdaq 100. Во Азија рекордната квартална загуба во одделот за чипови на „Самсунг“ (Samsung Electronics Co) влијаеше на нејзините акции.

Силвија Шенг, стратег за повеќе средства за „ЏП Морган“ (JPMorgan Asset Management), рече дека менаџерот на фондот предвидува економското закрепнување на Кина да се одрази на корпоративните профити во месеците што следуваат.

„Ние мислиме дека тоа треба да се случи со оглед на тоа колку беше силен моментот за закрепнување во првиот квартал“, рече таа во интервју за телевизијата „Блумберг“.

Еврото сосема малку ја промени вредноста во однос на американскиот долар и нивниот курс изнесува 1,1052 долари за евро. Златото поскапе за 0,5 проценти, доближувајќи се кон границата од 2.000 долари за унца. Поточно, неговата вредност утрово изнесува 1.998,83 долари.

Позитивно е расположението и меѓу инвеститорите на криптопазарот, каде што најголемиот токен, биткоинот, порасна за 1,7 отсто, достигнувајќи 28.906,7 долари, а етерот ја зголеми својата вредност за 1,8 отсто и сега чини 1.900,01 долари.