Раст на американските и европските фјучерси, азиските сo мешан резултат

Азиските акции се движат во наизменична насока, фјучерсите на американските акции пораснаа, а државните обврзници ги одржаа добивките од претходниот ден, бидејќи инвеститорите ги одмеруваат знаците на заладување на пазарот на работни места и напорите да се поправат врските меѓу Вашингтон и Пекинг.

Индексот S&P 500 падна за 0,2 отсто, а технолошкиот Nasdaq 100 порасна за 0,3 отсто. Европскиот индекс Euro Stoxx 50 ја зголеми својата вредност за 0,3 проценти, а азиските берзански индекси се движат меѓу пад од 0,4 отсто до раст од 0,6 проценти.

 

 

Геополитиката обезбеди мала поддршка за расположението на инвеститорите, откако американскиот советник за национална безбедност Џејк Саливан се состана со највисокиот кинески дипломат Ванг Ји, за да ги намали зголемените тензии меѓу нациите.

„Апетитот за ризик на берзата веројатно ќе биде подигнат со веста за состанокот САД - Кина. Кинеските акции што котираат во странство и кинескиот интернет-сектор, на кои странски инвеститорите имаат релативно висока изложеност, најверојатно ќе добијат поттик од тоа“, рече Алвин Нган, аналитичар во „Жонгаи“ (Zhongtai Financial International Ltd).

Технолошкиот индекс Nasdaq 100 додаде 0,3 проценти откако „Алфабет“ (Alphabet Inc.) ги прикажа своите алатки за вештачка интелигенција. Сепак, останува многу неизвесност што ги охрабрува инвеститорите да бараат заштита од нестабилноста.

Главниот извршен директор на „ЏП Морган“ (JPMorgan), Џејми Дајмон, во интервју за телевизијата „Блумберг“ рече дека треба да се заврши со банкарската криза, додавајќи дека регулаторите треба да направат сè што е потребно за да ја подобрат ситуацијата. Тој предвиде дека претстојат повеќе регулативи за заемодавците.

Инвеститорите ги премеруваат вестите дека средбата меѓу претседателот Џо Бајден и претседателот на Претставничкиот дом, Кевин Мекарти, закажана за денеска, ќе биде одложена.

„Би било ирационално САД да не ја подигнат максималната граница за долгот. Ова е политичка игра и мислам дека пазарот навистина не обрнува внимание на тоа“, рече Ева Адос, главен инвестициски стратег за „ЕР шеарс“ (ERShares), во интервју за телевизијата „Блумберг“.

Статистичките податоци покажаа дека новите барања за невработеност во САД достигнаа највисоки нивоа од октомври 2021 година, додека производствените цени во април се зголемија за 0,2 отсто, што е заостанување во однос на процените на економистите за зголемување од 0,3 отсто. Извештаите покажуваат дека кампањата за затегнување на политиката на Федералните резерви (ФЕД) може конечно да има ефект врз инфлацијата, бидејќи централната банка оди по јаже меѓу зауздување на растот на цените и доведувањето на економијата во пад.

Доларот остана рамномерен откако во претходната сесија порасна најмногу во последните два месеца. Сега еврото во однос на американскиот долар се тргува по курс од 1,0924 долар за евро. Вредноста на златото се намали за 0,2 отсто, на 2.011,31 долари за унца.

Биткоинот падна за 1,2 отсто, на 26.678,6 долари, што е најниско ниво од март. Етерот, пак, загуби 1,7 отсто од вредноста и се тргува по цена од 1.766,28 долари.

Во моментов нема коментари за веста. Биди прв да коментира...

Остави коментар