Оптимизам на берзите, азиските акции ја следат добивката на американските

Азиските берзи напредуваа додека трговците се обложуваат на напредок во преговорите за максималната граница на американскиот долг, што ќе го отстрани застојот на глобалните пазари. Акциите во Јапонија продолжија да растат откако го достигнаа највисокото ниво во последните 33 години. Мерачот на азиските акции се движи кон својот најголем раст од март.

 

 

Индексот S&P 500 утрово е со минимални промени, откако вчера затвори со раст од 1,2 отсто, додека технолошкиот индекс Nasdaq 100 е непроменет по растот од 1,2 отсто. Европскиот индекс Euro Stoxx 50 се зголеми за 0,6 проценти. Сите берзански индекси во Азија се во позитива почнувајќи од 0,5 отсто во Австралија до 1,1, односно 1,2 отсто во Хонгконг и Јапонија.

„Јапонија има огромен фокус на параметарот за поврат на капиталот, а тоа му помага на растот на акциите. Во Јапонија очекувавме скок и тоа се случи. Мислиме дека има уште да се оди во таа насока“, рече Анита Гупта, раководителка за стратегија за капитал за „Емирејтс НВД“ (Emirates NBD), во интервју за телевизијата „Блумберг“.

Американските фјучерси беа маргинално пониски во Азија, откако S&P 500 и Nasdaq 100 вчера затворија блиску до највисоките нивоа достигнати во текот на дневното тргување, искачувајќи се за повеќе од еден отсто.

Претседателот Џо Бајден изрази уверување дека нема да има неисполнување на обврските на САД, а претседателот на Претставничкиот дом, Кевин Мекарти, рече дека постигнувањето договор оваа недела е остварливо. Раководителот на „ЏП Морган Чејс“ (JPMorgan Chase & Co), Џејми Дајмон, рече дека американската влада веројатно нема да го плати својот долг откако тој и другите банкарски лидери се состанаа во Вашингтон за да разговараат за лимитот на долгот.

„И покрај некои конструктивни наслови околу преговорите, постојат ризици околу максимумот на американскиот долг. Ако забележиме зголемен стрес на пазарот на почетокот на јуни, тогаш тоа ќе влијае и на капиталот во ЕУ“, напиша во белешка Крис Вестон, раководител за истражување во „Пеперстоун“ (Pepperstone Group Ltd).

Доларот и државните обврзници беа малку променети во Азија. Еврото беше малку променето, така што во однос на американскиот долар се тргува по курс од 1,0836 долар за евро. Потпретседателот на Европската централна банка (ЕЦБ), Луис де Гвиндос, рече дека ЕЦБ го завршила најголемиот дел од затегнувањето, но сè уште има пат што треба да се изоди.

 

На криптопазарот нема значителни промени, па цената на биткоинот е 27.348,72 долари, а етерот се тргува за 1.825,1 долар.