Раст на американските, пад на азиските акции

Државните обврзници и фјучерсите на американските акции напредуваа поради надежите дека Конгресот ќе усвои договор за долг за да го спречи неисполнувањето на обврските од страна на САД, бидејќи лидерите на Белата куќа и републиканците во Конгресот го засилија лобирањето за поддршка на договорот.

Благајничките записи со скоро достасување се зголемија во азиските часови на тргувањето денеска, откако американските пазари вчера беа затворени поради празник. Меѓутоа, часовникот отчукува, бидејќи поддржувачите на договорот имаат само една недела да го добијат договорот преку Конгресот пред евентуалното неплаќање на 5 јуни, што може да има катастрофални последици за глобалните пазари.

Претседателот Џо Бајден лично ги повика пратениците да го поддржат законот со гласање од Претставничкиот дом, што најверојатно ќе се случи утре, пред договорот да оди во Сенатот.

 

 

Договорите за S&P 500 и Nasdaq 100 се зголемија за 0,2 односно 0,4 проценти, додека европските фјучерси остварија мали добивки. Референтната вредност на капиталот во Азија падна, бидејќи клучниот мерач на кинеските акции на берзата во Хонгконг се упати кон мечкин пазар. Хонгконшкиот индекс падна веќе петти ден, со што загубите од врвот достигнат на 27 јануари се околу 20 проценти. Падна и референтниот индекс на Шангај.

Нестабилното економско закрепнување, интензивираните геополитички тензии и послабиот јуан ги држат глобалните инвеститори подалеку од кинеските пазари. Сликата беше поинаква во Јужна Кореја, при што тамошниот индекс е со мал раст главно поради добивките кај производителите на чипови во услови на огромен интерес за вештачката интелигенција. „Самсунг“ (Samsung Electronics Co.) и „СК Хиникс“ (SK Hynix Inc.) се искачија на највисоко ниво во повеќе од една година откако „Морган Стенли“ (Morgan Stanley) ги покачи ценовните цели за корејските производители на чипови, при што „СК Хиникс“ е нејзиниот најдобар избор како клучен корисник на можноста за вештачка интелигенција на „Енвидија“ (Nvidia Corp).

Доларот, кој има корист од вознемиреноста околу законскиот лимит за задолжување, беше малку променет, при што курсот на еврото и доларот утрово е 1,0704 американски долар за евро. Вредноста на златото падна за 0,2 процента на 1.938,69 долари за унца.

На криптопазарот инвеститорите се малку порасположени, па вредноста на биткоинот порасна за 0,4 проценти, на 27.804,2 долари, додека таа на етерот се зголеми за 0,3 отсто, на 1.900,01 долари.

За креаторите на политиката на Федералните резерви (ФЕД), деталите од договорот за американскиот долг ќе бидат уште едно момент на разгледување кога ќе се состанат во јуни.

„Веруваме дека овој договор го зацврстува зголемувањето од 25 базични поени на состанокот на 13 и 14 јуни. Со бледнеењето на стресовите во банкарскиот сектор, потенцијалното неисполнување на обврските беше навистина единственото нешто што можеше да спречи зголемување следниот месец. Што е уште поважно, шансите за намалување на стапките до крајот на годината сега се целосно намалени, како што требаше да биде одамна“, напиша во белешка Вин Тин, глобален раководител за валутни стратегии во „Браун брадрс Хериман“ (Brown Brothers Harriman & Co).

Според некои процени, под претпоставка дека Конгресот ќе го одобри договорот, Министерството за финансии наскоро може да го дополни својот готовински биланс и до крајот на третиот квартал да продаде записи во вредност поголема од една илјада милијарди американски долари.

Во моментов нема коментари за веста. Биди прв да коментира...

Остави коментар