Азиските берзи во пад, Волстрит го задржува оптимизмот

Берзанските индекси на Волстрит пораснаа во понеделникот пред објавувањето на финансиските извештаи за вториот квартал. Инвеститорите се надеваат дека резултатите ќе бидат подобри од очекувањата. Исто така се очекува крајот на циклусот на зголемување на каматните стапки од страна на Федералните резерви (ФЕД).

Така, S&P 500 порасна за 0,39 отсто, на 4.522 поени, а Nasdaq за 93 отсто, на 14.244 поени. Dow Jones зајакна за 0,22 отсто, на 34.585 поени.

Во вторник финансиски извештаи објавуваат Банката на Америка (Bank of America) и „Морган Стенли“ (Morgan Stanley), а резултати ќе објават и производителот на електрични автомобили „Тесла“ и стриминг-сервисот „Нетфликс“. Инвеститорите внимателно ги следат сите показатели за економскиот развој, убедени дека американската централна банка наскоро ќе му стави крај на циклусот на зголемување на каматните стапки, бидејќи инфлаторните притисоци слабеат. Се очекува ФЕД уште еднаш да ги зголеми каматните стапки овој месец за 0,25 процентни поени и тоа да биде последното зголемување во овој циклус.

Во понеделникот растот на берзанските индекси беше поттикнат од технолошките акции на „Тесла“ и „Епл“ (Apple). Вредноста на акциите на „Активижн Близард“ (Activision Blizzard) исто така скокна откако „Мајкрософт“ разговараше со британските регулатори за договор за преземање на компанијата во вредност од 69 милијарди долари.

Индексот на „Блумберг“ за доларот падна за 0,07 отсто. Еврото зајакна за 0,2 отсто, на 1,1254 долари.

Азиските берзи паднаа по објавувањето на податоците за послабиот економски раст на Кина, во споредба на она што се очекуваше. Во Кина и Хонгконг акциите се слизнаа за 0,3 и два отсто, соодветно. Најавите за владини стимулации не го коригираа тој пад. Економистите во некои од најголемите банки, како што се „ЏП Морган“ (JPMorgan Chase & Co.), „Морган Стенли“ и „Ситигруп“ (Citigroup), ги намалија прогнозите за раст на пет проценти.

Биткоинот поскапе за 0,5 отсто, на 30.096 долари, а етерот поскапе за еден отсто, на 1.909 долари.

Приносите на американските десетгодишни обврзници се зголемија за еден базичен поен, на 3,8 отсто.

Фјучерсите на суровата нафта вест тексас интермедиејт (ВТИ) поскапеа за 0,4 отсто, на 74,42 долари за барел, додека златото поскапе за 0,3 отсто, на 1.960 долари за унца.