Компаниите задолжително на берза до 2027 година

Уште за три години се продолжува периодот во кој на официјалниот пазар на Македонската берза ќе има и задолжителна котација. Таму котираат компаниите што за тоа имаат законска обврска, а сега Владата предлага измени на Законот за хартии од вредност според кои задолжителната котација наместо до април следната година, ќе трае до 30 април 2027 година.

Ова не е првпат обврската да се пролонгира. Во 2021 година Собранието го изгласа предлогот со кој, наместо до 2022 година, задолжителната котација беше продолжена до 2024 година. Воведена е пред десет години, односно профункционира од 2013 година, за да се зголеми транспарентноста на пазарот. Компаниите што котираат во задолжителна котација имаат обврска редовно да објавуваат финансиски извештаи. Исто така тие се задолжени преку веб-страницата на Македонската берза редовно да ги објавуваат ценовно чувствителните информации. 

Во Законот, кој моментално е во собраниска процедура и се предлага да се носи по скратена постапка поради тоа што не е обемен, се наведува дека воведувањето на мерката за задолжителна котација дало позитивни ефекти врз транспарентноста на акционерските друштва и развивањето на свеста за предностите од присуство на берзата.

„Имајќи предвид дека мерката за задолжителна котација е позитивна за пазарот на капитал, особено во делот на зголемување на свесноста на компаниите во однос на нивните обврски за транспарентност, со предлог-законот се предлага продолжување на рокот за задолжителна котација за период уште од три години“, се наведува во образложението на предлогот за измени на Законот за хартии од вредност.

На Македонската берза обврска да котираат сега имаат 69 компании, од кои неколку се долгорочно суспендирани поради тоа што нередовно објавувале информации, но договорот за котација сè уште е активен. Котацијата е на официјалниот берзански пазар, а дел од условите што мора да се исполнат се номинален капитал од најмалку еден милион евра и минимум 50 акционери.

Инаку, иако бројот на компании што котираат во задолжителна котација е речиси тројно поголем од тој на акциите во берзанска котација, прометот со тие хартии од вредност е значително помал. Се истакнуваат некои издавачи чија активност е поголема, а од почетокот на годинава вкупната вредност на прометот е нешто над 370 милиони денари. Вкупниот промет на официјалниот пазар надминува две милијарди денари.

 

 

Впрочем, најголем дел од овој промет е остварен во суперкотација, а таму е котирана само една компанија - Комерцијална банка.

Моменталната пазарна капитализација на Македонската берза е околу 160 милијарди денари (2,6 милијарди евра), а коефициентот цена/добивка изнесува 13,48.

 

 

 

Во моментов нема коментари за веста. Биди прв да коментира...

Остави коментар