По паузата на ЕЦБ, европските акции се во зелената зона

Откако Европската централна банка одлучи да направи пауза од зголемувањето на каматните стапки, акциите на европските берзи во четвртокот го завршија тргувањето претежно во зелената зона.

Централната монетарна институција на Европската унија одлучи да ги задржи каматните стапки на ниво од четири отсто со предупредување дека, иако инфлацијата е забавена во последните неколку месеци, постои можност таа повторно да порасне во наредниот период.

На резултатите од денешното тргување влијаеше одлуката на Банката на федерални резерви претходниот ден, која исто така направи пауза и сигнализираше дека во наредните години би можеле трипати да ја намалат каматната стапка.

На лондонската берза оптимизмот го подгреа и Банката на Англија која ги следеше одлуките на колегите од САД и ЕУ за паузирање, па индексот FTSE го заврши тргувањето со добивка од 1,33 отсто.

На крајот од тргувањето, Euro Stoxx забележа добивка од 0,87 отсто, францускиот CAC од 0,59 отсто, додека DAX имаше благ пад од 0,08 отсто.

Еврото поскапе во однос на доларот за 1,20 отсто, па со него се тргуваше по курс од 1,1 долари.