Европските и азиските акции растат, доза позитива на пазарите

Фјучерсите на европските акции пораснаа, исто како и азиските акции, бидејќи апетитот за ризик на финансиските пазари доби дополнителен поттик од најновите мерки на Кина за поддршка на економијата, но и од оптимизмот во САД.

Вредноста на јенот падна за еден отсто во однос на американскиот долар во пресрет на резултатите од изборите. Вредноста на еврото во однос на американскиот долар исто така падна за 0,1 отсто и сега овие валути се тргуваат по курс од 1,1164 долар за евро.

Договорите од индексот Euro Stoxx 50 се зголемија за 0,2 проценти, паралелно со кинеските акции, откако властите ветија дека ќе ја зголемат фискалната поддршка и ќе го стабилизираат секторот за недвижности за да го заживеат растот. Фјучерсите за американските индекси утрово благо паднаа откако претходно индексот S&P 500 значително порасна. Доларот ја зголеми својата вредност, додека приносите на 10-годишните државни обврзници на САД останаа непроменети.

Поддршката во двете најголеми светски економии претставуваше катализатор за пазарите неделава, при што Кина денеска го намали износот на готовина што банките мора да го чуваат како задолжителна резерва. Преферираниот показател за инфлација на Федералните резерви (Фед), како и податоците за потрошувачката, кои треба да се објават во текот на денов, може да обезбедат дополнителен поттик на патот за намалување на каматните стапки во САД.

„Денешниот азиски пазар целосно се води од кинескиот пакет мерки за стимул и поддршка за севкупниот глобален раст“, рече Метју Хаупт, портфолио-менаџер во „Вилсон асет менаџмент интернешнел“ (Wilson Asset Management International).

Народната банка на Кина во вторникот лансира една од најхрабрите политички кампањи на земјата во последните децении, при што Пекинг објави силен стимулативен пакет во обид да ја зајакне забавената економија и со тоа да ја врати довербата на инвеститорите. Таквиот потег ги вивна кинеските акции.

Прочитајте повеќе тука.

Дополнителни позитивни вести дојдоа и од економските податоци на САД објавени ноќеска. Ревидираните податоци покажаа дека американската економија е во подобра состојба од првично очекуваното, поттикната главно од поголемата потрошувачка поради силните приходи. Падот на барањата на невработените во САД ја нагласи отпорноста на пазарот на трудот.

Кај суровините, нафтата го продолжи остриот дводневен пад, оставајќи ги цените на пат да остварат значителен неделен пад поради изгледите за поголема понуда од страна на членките на ОПЕК (Организацијата на земји извознички на нафта), Саудиска Арабија и Либија. Бакарот се врати на ценовно ниво од над 10.000 долари за тон, а железната руда ја проби нагоре границата од 100 долари.

Златото се движи кон трета неделна добивка откако постави неколку последователни рекорди поради оптимизмот дека Фед ќе го одржи годинава агресивното темпо на намалување на каматните стапки.

На криптопазарите биткоинот порасна за 1,2 процент, достигнувајќи вредност од 65.478,54 долари. За исто толку порасна и етерот, кој сега се тргува по цена од 2.663,46 долари.

Во моментов нема коментари за веста. Биди прв да коментира...

Остави коментар