Продадени два блока акции од „Стопанска банка Битола“ за 728.000 евра

Во две блок трансакции со вкупна вредност од 48,1 милиони денари (782.000 евра) вчера на Македонската берза се истргуваа вкупно 12.103 акции од „Стопанска банка“ АД Битола кои претставуваат 3,09 проценти од основната главнина на банката.

Во првата блок трансакција вредна 15,7 милиони денари (289.000 евра) беа продадени 3.850 акции по цена од 4.100 денари за акција, а во втората блок трансакција вредна 32,3 милиони денари (526.000 евра) беа продадени 8.253 акции по цена 3.920 денари за акција.

Тргувањето со блокови акции на банката доаѓа по неуспешниот обид за преземање од „Комерцијална банка“. „Блумберг Адрија“ веќе пишуваше дека понудата за преземање на „Стопанска банка“ АД Битола ја прифатиле 149 сопственици на обични акции со право на глас, кои поседуваат вкупно 176.154 обични акции, односно 45,05 проценти од сите акции со право на глас издадени од „Стопанска банка“ АД Битола. Понудата за преземање се однесуваше на сите 390.977 обични акции со право на глас издадени од „Стопанска банка“ АД Битола.

Во понудата за преземање, прагот на успешност, односно најмалата количина обични акции која требаше да биде прифатена за да се смета за успешна понудата за преземање беше определена на 261.956 обични акции со право на глас, што претставува 67 проценти плус 1 акција од вкупниот број обични акции со право на глас издадени од битолската банка.

„Со оглед на тоа што прагот на успешност не е постигнат, понудата за преземање на ‚Стопанска банка‘ АД Битола од страна на ‚Комерцијална банка‘ АД Скопје се смета за неуспешна. Причина за неуспешност е тоа што не се изјаснија позитивно по однос на понудата на банката доволен број акционери кои поседуваат обични акции со право на глас, односно во законски утврдениот рок до 22.09.2024 година не дадоа изјава за прифаќање на понуда за откуп по цена од 3.200 денари по акција“, соопшти тогаш „Комерцијална банка“.

Во моментов нема коментари за веста. Биди прв да коментира...

Остави коментар