„Комерцијална банка“ објави колку пари нуди за „Стопанска банка“ АД Битола

„Комерцијална банка“ ќе плати по 3.200 денари за една акција на „Стопанска банка“ АД Битола, објави денеска преку Македонската берза. Во истото соопштение банката известува дека Народната банка на Република Северна Македонија ѝ издаде на „Комерцијална банка“ АД Скопје  претходна согласност за стекнување капитален дел од 100 отсто од вкупниот број обични акции со право на глас издадени од „Стопанска банка“ АД Битола.

Намерата за преземање инаку сè уште не е објавена и, освен цената, не се знаат другите детали. На 1 август годинава „Комерцијална банка“ соопшти дека ќе даде понуда да ја преземе помалата банка. „Во согласност со Законот за преземање на акционерските друштва, ’Комерцијална банка’ АД Скопје, застапувана од Управниот одбор, има намера да дадe понуда за преземање на сите обични акции со право на глас издадени од ’Стопанска банка’ АД Битола“. 

Според берзанските податоци, издадени се 390.977 акции на „Стопанска банка“ АД Битола, што значи дека ако „Комерцијална банка“ преземе 100 отсто од акциите за понудената цена, треба да плати 1,25 милијарда денари (20,3 милиони евра). Пазарната капитализација на банката во 2023 година била 15,3 милиони евра.

Aкциите на „Стопанска банка“ АД Битола во последните денови се тргуваат по 3.700 денари. 

Инаку, единствен акционер што има над пет отсто од обичните акции во „Стопанска банка Битола“ е друштвото за производство и трговија „Пелистерка“ АД Скопје. 

„Блумберг Адрија“ во неколку наврати пишуваше за намерата за преземање на оваа банка од страна на „Комерцијална банка“.

Кон крајот на април „Комерцијална банка“ АД Скопје соопшти дека ќе почне длабинска анализа за работењето на „Стопанска банка“ АД Битола и дека анализата е за да се дефинира намера за присоединување на „Стопанска банка“ АД Битола кон „Комерцијална банка“ АД Скопје.

„По завршувањето на постапката на длабинска анализа, ’Комерцијална банка’ АД Скопје ќе донесе одлука дали да продолжи постапката со изразување намера за склучување на трансакцијата на присоединување, за што јавноста ќе биде известена“, соопштија тогаш.

Информацијата за преземање првично беше објавена во септември лани. „Стопанска банка Битола“ и во 2023 година оствари загуба, а „Комерцијална банка“ АД Скопје ја заврши 2023 година уривајќи неколку рекорди. 

Во моментов нема коментари за веста. Биди прв да коментира...

Остави коментар