Се чека понудата: Колку ќе плати „Комерцијална банка“ за акциите на „Стопанска банка Битола“?

Црвенилото што ја зафати и Македонската берза по тешкиот понеделник продолжи и вчера. Главниот берзански индекс МБИ 10 во вчерашното тргување загуби дополнителен над еден отсто од вредноста. И вчера, исто како и во понеделникот, меѓу најголемите губитници беа банките.

Сепак, ова не важи за акцијата на „Стопанска банка Битола“. Во понеделникот цената се зголеми за 1,69 отсто, а вчера додаде дополнително 1,28 отсто и стигна до цена од 3.393 денари. 

Позитивниот тренд секако се поклопува со очекувањето на понудата од „Комерцијална банка“ за преземање на „Стопанска банка Битола“.

„Блумберг Адрија“ пишуваше дека „Комерцијална банка“ минатата недела објави дека ќе даде понуда за преземање на сите акции од „Стопанска банка“ АД Битола. За ова банката извести на Македонската берза, објавувајќи дека „во согласност со Законот за преземање на акционерските друштва, Комерцијална банка АД Скопје, застапувана од Управниот одбор, има намера да даде понуда за преземање на сите обични акции со право на глас издадени од Стопанска банка АД Битола“.

По која цена ќе се откупуваат акциите?

Понудата се очекува да биде дадена многу брзо затоа што, според извори на „Блумберг Адрија“, договорот е веќе направен и е обезбеден мнозински пакет акции. Целата постапка би требало да заврши до октомври. Сепак, нашите извори не прецизираат која цена ќе биде понудена.

Во согласност со одредбите од Законот за преземање акционерски друштва понудата е задолжителна во сите случаи кога станува збор за стекнување со 25 отсто или повеќе од хартиите со право на глас или тоа што се нарекува контролен праг за преземање.

Цената на хартиите од вредност во процесот на преземање е уредена со членот 14 од истиот закон. Тој прецизира дека доколку преземачот во последните 12 месеци купувал акции, цената не смее да биде пониска од највисоката цена што ја платил за купените акции во годината.

„Доколку оваа цена е пониска од просечната цена на хартиите од вредност постигната на овластена берза во последните 12 месеци пред известувањето за намерата за преземање во согласност со членот 22 став (1) од овој закон, преземачот е должен да ја понуди најмалку просечната цена постигната на овластена берза“, се наведува во законот.

Акцијата е на листа за набљудување

Од почетокот на неделава Македонската берза ја стави акцијата на „Стопанска банка Битола“ на листата за набљудување.

„Внесување на друштвото Стопанска Банка АД Битола на листата за набљудување е со цел за обрнување внимание на инвеститорската јавност поради објавената намера за давање понуда за преземање на друштвото“, соопшти берзата.

Според евиденцијата на Македонската берза за последните 52 недели, максималната вредност на акцијата изнесувала 3.393 денари (вчерашна цена), а минимална цена 2.371 денар (од ноември лани).

Македонска берза

Во истиот период во 166 трансакции биле истргувани 14.162 акции и бил остварен промет од 37.441.314 денари.

Во овие податоци не се вклучени последните блок трансакции. Последната блок трансакција беше во март, кога беа истргувани 16.019 акции или 4,10 отсто од главнината по цената од 2.892 денари за акција (тогашната номинална вредност изнесуваше 3.000 денари).

Претходно во две блок трансакции во септември лани беа продадени вкупно 10.291 акција по цена од 2.600 денари за акција, повторно под номиналната вредност.

И Народната банка го следи целиот процес во согласност со законската регулатива и најдобрите супервизорски практики.

„Реализацијата на изразената намера од Комерцијална банка АД Скопје за преземање на сите обични акции од Стопанска банка АД Битола ќе значи окрупнување на акционерската структура во Стопанска банка АД Битола и е чекор кон натамошна консолидација на банкарскиот систем во земјата, што е значајно за неговата стабилност“, рекоа од НБРМ за „Блумберг Адрија“.

Првично, информацијата за преземање беше објавена во септември лани. „Стопанска банка Битола“ и во 2023 година оствари загуба, а „Комерцијална банка“ АД Скопје ја заврши 2023 година уривајќи неколку рекорди.

Во моментов нема коментари за веста. Биди прв да коментира...

Остави коментар