.webp){kind=icon}
Над 136 милиони евра оствариле трите најголеми банки во Македонија како нето-каматни приходи во првото полугодие од годинава. Толку пари всушност имаат на своите биланси вкупно „НЛБ банка“, „Стопанска банка“ АД Скопје и „Комерцијална банка“ од каматите што ги наплатиле од клиентите по основ на издадени заеми минусирани за расходите од камати.
Овие три банки во континуитет имаат раст на профитабилноста, а приходите од камати се клучна ставка во вкупните нивни приходи, во кои значаен раст остваруваат и од провизии и надоместоци. Резултатите што ги анализираме се остварени во време на одржано високо ниво на каматни стапки, политика што ја диктира Народната банка на Северна Македонија (НБРСМ). Во услови на висока инфлација, македонската централна банка сè уште не одлучи да ја намали висината на основната камата односно каматата на благајничките записи, која во моментов изнесува високи 6,30 отсто.
Процесот на олабавување на рестриктивната политика веќе започна во еврозоната, откако Европската централна банка одлучи да ги намали стапките, а следниот состанок на Извршниот одбор на НБРСМ е на 17 септември. Инаку, во првата половина од годината македонскиот бруто-домашен производ порасна за 1,2 отсто, а стапката на инфлација се одржува на ниво од 3,5 до 3,8 проценти.
Од трите најголеми банки чии финансиски резултати беа објавени во изминатите денови, најголеми нето-каматни приходи има „Стопанска банка“ АД Скопје. На годишно ниво имаат раст од 18 проценти, додека кај „НЛБ банка“ и „Комерцијална банка“ растот е околу 22 отсто.
Во периодот од јануари до јуни вкупната актива на „Стопанска банка“ изнесува 134.149.001 илјади денари (2,2 милијарди евра), односно е повисока во однос на крајот на годината за 2 отсто. „Комерцијална банка“ има вкупна актива од 166.758,4 милиони денари (2,7 милијарди евра) и во однос на декември 2023 година бележи зголемување од 1,9 отсто. Зголемувањето на вкупната актива во најголем дел се должи на зголемените кредити на комитенти, а во помал обем и поради зголемените вложувања во хартии од вредност и зголемените кредити и побарувања од банки. Вкупната актива на „НЛБ банка“ е 115.234.243 (1,9 милијарда евра).
Годишниот раст на каматите не запира. Според последните податоци од јуни годинава, во тој месец просечната каматна стапка на вкупните кредити изнесува 5,47 проценти и забележа месечен пад од 0,02 п.п., при годишно зголемување од 0,35 п.п.
Просечната каматна стапка на вкупните депозити е зголемена на месечна и на годишна основа за 0,02 п.п. и 0,48 п.п., соодветно, и изнесува 1,88 процент.
„Блумберг Адрија“ веќе пишуваше поединечно за профитабилноста на најголемите банки во првото полугодие годинава.
