„Изиџет“ доби понуда од 5,7 милијарди фунти од „Аполо“, кој неочекувано се вклучи во трката со „Касллејк“

„Изиџет“ (EasyJet Plc) доби нова понуда од приватниот инвестициски фонд „Аполо“ (Apollo Global Management) од 715 пени по акција, со што ја надмина конкурентската понуда на „Касллејк“ (Castlelake LP), во неочекуван пресврт во битката за преземање што отвора можност за наддавање меѓу двата американски инвестициски фонда.

Бидејќи понудата на „Аполо“ од 5,7 милијарди фунти (7,7 милијарди долари) е подобра, „Изиџет“ повеќе нема намера да им препорача на своите акционери да ја прифатат понудата на „Касллејк“, се наведува во соопштението на нискобуџетната авиокомпанија објавено во петокот. Во однос на понудата на „Аполо“, компанијата соопшти дека финансиските услови на готовинската понуда се такви што Управниот одбор би им препорачал на акционерите да ја прифатат.

Неочекуваното појавување на „Аполо“ како нов учесник следува по повеќекратните рунди разговори меѓу „Изиџет“ и „Касллејк“ во изминатиот месец, при што вториот постојано ја зголемуваше својата понуда за да ги започне преговорите. На „Касллејк“ му беа потребни пет обиди и понуда од 690 пени по акција за да го убеди „Изиџет“ да му овозможи увид во своите книги, а сега инвеститорот треба да одлучи дали може да се врати со уште повисока понуда за да го надмине „Аполо“.

„Касллејк“ сè уште има можна предност бидејќи доби пристап до деловните книги на „Изиџет“ по својата последна, повисока понуда. Инвестицискиот фонд, исто така, даде повеќе детали за структурата на својата понуда, при што поранешниот директор на „Изиџет“, Питер Белју, е дел од двочлен менаџерски тим кој би имал мнозинска контрола. Во групата што ја достави понудата е и „Брукфилд“ (Brookfield Asset Management Ltd.).

Акциите на „Изиџет“ пораснаа за 15 отсто, односно на околу 676 пени, на отворањето на тргувањето во Лондон. Со акциите досега не се тргуваше по цената што последна ја понуди „Касллејк“, што укажува дека инвеститорите очекувале уште повисока понуда.

На нивото што сега го нуди „Аполо“, „би било потребно исклучително амбициозно преструктурирање на трошоците и значителен пресврт во заработката, далеку над она што моментално го предвидуваме, за оваа зделка да има смисла по оваа цена“, изјави Алекс Ирвинг, воздухопловен аналитичар во „Бернстајн“ (Bernstein).

„Аполо“ настојуваше да ги отфрли стравувањата дека авиокомпанијата би можела да биде распарчена доколку премине во приватна сопственост, имајќи предвид дека поединечните делови на „Изиџет“ вредат повеќе од целата компанија. Компанијата соопшти дека „им придава големо значење на луѓето“ и дека ќе биде важно да се идентификуваат и задржат клучните вработени низ целата групација „Изиџет“.

„Оперативните и комерцијалните амбиции на менаџментот на „Изиџет“ можат значително да се забрзаат преку пристапот до дополнителен капитал и подолгорочното деловно и стратешко планирање што го овозможува работењето како приватна компанија“, соопшти „Аполо“.

„Аполо“ соопшти дека ќе настојува да го исполни неопходниот услов што им овозможува на странски инвеститори да контролираат европска авиокомпанија. Како и „Касллејк“, „Аполо“ е американски субјект, што значи дека не може да стекне целосна контрола врз „Изиџет“, бидејќи авиокомпанијата работи според британски и европски правила кои бараат мнозинска сопственост и контрола да имаат државјани од регионот. Тоа значи дека на „Аполо“ му е потребен европски партнер.

Според понудата на „Аполо“, акционерите на авиокомпанијата ќе имаат можност своите постојни акции да ги заменат за таканаречена алтернативна сопственичка структура („stub equity alternative“), преку која фондовите на „Аполо“ ќе го држат своето вложување во авиокомпанијата. Понудата на „Аполо“ ќе биде финансирана преку сопствен капитал и должнички кредитни линии, при што „Берклис“ (Barclays) ќе го организира должничкото финансирање.

И „Касллејк“ и „Аполо“ имаат искуство во воздухопловната индустрија. „Касллејк“ финансирал лизинг на авиони и претходно беше коинвеститор во преземањето на скандинавската авиокомпанија САС од страна на „Ер Франс-КЛМ“ (Air France-KLM). „Аполо“ управува со бизнис за финансирање на авиони и воздухопловство, кој вклучува компанија за лизинг, управување и финансирање со седишта во Њујорк, Даблин и Сингапур.

Заедно, воздухопловната платформа на „Аполо“ финансира повеќе од 360 комерцијални авиони и повеќе од 60 авионски мотори, според компанијата.