„Комерцијална банка“ ќе даде понуда за „Стопанска банка Битола“

„Комерцијална банка“ ќе даде понуда за преземање на сите акции од „Стопанска банка“ АД Битола. За ова банката извести на Македонската берза, објавувајќи дека „во согласност со Законот за преземање на акционерските друштва, Комерцијална банка АД Скопје, застапувана од Управниот одбор, има намера да дадe понуда за преземање на сите обични акции со право на глас издадени од Стопанска банка АД Битола“.

Во објавата не се прецизира кога точно ќе се случи тоа и која ќе биде понудената цена. Нема детали и за тоа што доколку сите акционери не се согласат да ги продадат акциите. Сепак, според наши неофицијални информации, веќе е обезбеден мнозински пакет акции и договорот е направен. Намерата за преземање ќе се даде брзо, а се очекува целиот процес да заврши до октомври. Инаку, нашиот извор, кој е од високото раководство на „Комерцијална банка“, вели дека ако не се случи оваа купопродажба, „Стопанска банка“ АД Битола ќе мора да бара друго решение за идното работење. 

Македонска берза

Според берзанските податоци, издадени се 390.977 акции на „Стопанска банка АД Битола“, кои вчера се тргуваа по цена од 3.080 денари за акција во просек, додека книговодствената вредност на акцијата во 2023 година изнесува 4.326 денари.

Инаку, единствен акционер што има над пет отсто од обичните акции во „Стопанска банка Битола“ е друштвото за производство и трговија „Пелистерка“ АД Скопје. 

„Блумберг Адрија“ во неколку наврати пишуваше за намерата за преземање на оваа банка од страна на „Комерцијална банка“.

Кон крајот на април „Комерцијална банка“ АД Скопје соопшти дека ќе почне длабинска анализа за работењето на „Стопанска банка“ АД Битола и дека анализата е за да се дефинира намера за присоединување на „Стопанска банка“ АД Битола кон „Комерцијална банка“ АД Скопје.

„По завршување на постапката на длабинска анализа, ’Комерцијална банка’ АД Скопје ќе донесе одлука дали да продолжи постапката со изразување намера за склучување на трансакцијата на присоединување, за што јавноста ќе биде известена“, соопштија тогаш.

Првично, информацијата за преземање беше објавена во септември лани. „Стопанска банка Битола“ и во 2023 година оствари загуба, а „Комерцијална банка“ АД Скопје ја заврши 2023 година уривајќи неколку рекорди. 

Во моментов нема коментари за веста. Биди прв да коментира...

Остави коментар