Дали акционерите на „Стопанска банка Битола“ добија фер понуда?

Доколку некој акционер на „Стопанска банка“ АД Битола купил акции во текот на пандемиското берзанско тргување, на денот кога своите акции ќе ѝ ги продаде на „Комерцијална банка“ ќе заработи 28 отсто на инвестираните пари. Во тоа време акцијата се тргуваше меѓу 2.400 и 2.600 денари, а „Комерцијална банка“ вчера извести дека нуди по 3.200 денари за една акција. Сепак ова е само пример, во текот на последните неколку дена акцијата на банката се тргува по доста повисоки цени.

Последната цена е со тренд на раст, движење што следуваше по објавата од страна на „Комерцијална банка“, дадена на 1 август годинава, со која тие информираа дека планираат да дадат понуда за преземање на „Стопанска банка“ АД Битола. Дополнително, ако се анализира книговодствената вредност на една акција на банката за 2023 година, може да се заклучи дека понудата е потценета.

Александар Ивановски, магистер по финансии и банкарство, за „Блумберг Адрија“ ја анализираше оваа понуда. Тој вели дека доколку се погледнат финансиските извештаи на „Стопанска банка“ АД Битола за последните две години, се забележува дека е вршена исправка на вредноста во билансот на успех и „намалување на добивката и потреба за издвојување резервации со цел да се превенира ризикот од работењето“.

„Банката работеше со загуби. Во изминатите три години немаше дивиденди иако во 2021 година банката работела со добивка. Тоа е показател дека и покрај остварената добивка, банката не поседувала вишок на капитал, услов што е наметнат од регулаторот (НБРСМ), за да може да ја распредели добивката“, вели Ивановски, кој додава дека затоа не може „да се дисконтираат идни парични текови со цел да се определи фер вредноста на акцијата на тој начин“. 

На 8 август годинава просечната цена беше 3.712 денари. Во последните 52 дена просечната цена сепак е многу пониска или 2.371 денар во просек.

Законски одредби

Како што веќе пишувавме, во согласност со одредбите од Законот за преземање акционерски друштва, понудата е задолжителна во сите случаи кога станува збор за стекнување со 25 отсто или повеќе од хартиите со право на глас или тоа што се нарекува контролен праг за преземање.

Цената на хартиите од вредност во процесот на преземање е уредена со членот 14 од истиот закон. Тој прецизира дека доколку преземачот во последните 12 месеци купувал акции, цената не смее да биде пониска од највисоката цена што ја платил за купените акции во годината.

„Доколку оваа цена е пониска од просечната цена на хартиите од вредност постигната на овластена берза во последните 12 месеци пред известувањето за намерата за преземање во согласност со членот 22 став (1) од овој закон, преземачот е должен да ја понуди најмалку просечната цена постигната на овластена берза“, се наведува во законот.

Кој ќе ги продаде акциите?

Народната банка на Македонија даде дозвола „Комерцијална банка“ да преземе 100 отсто од акциите на „Стопанска банка“ АД Битола. Според нашите сознанија, веќе е договорено банката да откупи мнозински пакет, но во помалото друштво има и многу мали акционери. Познавачите велат дека речиси нема опции да се продадат сите акции веднаш, од проста причина што некои можеби нема да знаат, некои најверојатно не се ни во земјава. Што ќе се случи со акционерите што имаат по неколку акции ќе одлучува менаџментот дополнително.

Инаку, единствен акционер што има над пет отсто од обичните акции во „Стопанска банка Битола“ е друштвото за производство и трговија „Пелистерка“ АД Скопје. 

Минатата недела од Народната банка за „Блумберг Адрија“ изјавија дека „реализацијата на изразената намера од ’Комерцијална банка’ АД Скопје за преземање на сите обични акции од ’Стопанска банка’ АД Битола ќе значи окрупнување на акционерската структура во ’Стопанска банка’ АД Битола и е чекор кон натамошна консолидација на банкарскиот систем во земјата, што е значајно за неговата стабилност“.

И Ивановски смета дека окрупнувањето е логичен сектор во македонскиот банкарски сектор.

Според берзанските податоци, издадени се 390.977 акции на „Стопанска банка“ АД Битола, што значи дека „Комерцијална банка“ треба да плати 1,25 милијарда денари (20,3 милиони евра) за сите нив. Пазарната капитализација на банката во 2023 година била 15,3 милиони евра.

 

Во моментов нема коментари за веста. Биди прв да коментира...

Остави коментар