Големи трансфери и банкарски промени во Македонија: Колку тежат?

Банкарскиот сектор во Македонија е меѓу најпрофитабилните сегменти во домашната економија, а во континуираниот раст на оваа дејност најголем придонес имаат големите банки, кои од година на година уриваат рекорди во заработката. Голема заслуга за тоа имаат менаџерските тимови на банките, кај кои во изминатиов период може да се забележат интересни трансфери и промени, што покажува дека во банкарскиот свет има силна конкуренција за позициите во управните одбори, што е разбирливо ако се земе предвид можноста за личен развој, но и финансиската заработка што ја носат овие позиции.

Трансфер од „Стопанска банка Скопје“ во „НЛБ банка“

Еден од последните примери за голем менаџерски трансфер во банкарскиот сектор е преминот на Тони Стојановски од „Стопанска банка Скопје“ во „НЛБ банка“, што предизвика значителни промени во управните одбори на двете банки.

Тони Стојановски/Извор: МИА

Имено, „Стопанска банка Скопје“ неодамна преку Македонската берза информира дека на 3 јуни годинава Стојановски поднел оставка од позицијата член на Управниот одбор и генерален директор за корпоративно банкарство. Стојановски беше познат како едно од заштитните лица на менаџерскиот тим на банката, со оглед на тоа што подолг период од својата кариера помина на функции во „Стопанска банка Скопје“. Причините за оставката станаа познати откако „НЛБ банка“ соопшти дека на 7 јуни годинава Бранко Грегановиќ поднел оставка од функцијата претседател на Управниот одбор на банката, како и дека Надзорниот одбор на „НЛБ банка“ со одлука донесена на 10 јуни годинава го именувал Тони Стојановски за нов претседател на Управниот одбор на банката.

Бранко Грегановиќ

Одлуката треба да стапи во сила по добивањето согласност од гувернерот на Народната банка, а дотогаш Грегановиќ ќе продолжи да ја извршува функцијата.

Промени и кај другите големи банки

Годинава промени имаше и во „Шпаркасе банка“. На Санел Костурица, претседател на УО и главен извршен директор, и на Нина Неданоска, членка и заменик-претседателка на УО, а кои се на овие функции од мај 2022 година, им се придружија двајца нови членови во Управниот одбор.

Шпаркасе банка

Погледнете ја галеријата

Шпаркасе банка

Погледнете ја галеријата

Шпаркасе банка

Погледнете ја галеријата

Шпаркасе банка

Погледнете ја галеријата

 

Имено, во април годинава Златица Цивкаровски и Александар Џорџевиќ беа назначени за членови на Управниот одбор на банката. Цивкаровска е надлежна за активности поврзани со стратегиско управување со ризик, активности поврзани со управување со кредитен ризик и наплата и активности поврзани со банкарски операции, а Џорџевиќ е надлежен за активности поврзани со работењето со информатичката технологија и дигиталните канали и организација.

Во февруари годинава имаше промени и во управниот одбор на „Халк банка“. Покрај Билал Суџубаши, претседател на УО и главен извршен директор, и Турхан Адеми, член на УО и извршен директор, на 8 февруари годинава, а по претходна одлука на Надзорниот одбор на банката, Александар Иљов беше назначен за член на Управниот одбор на „Халк банка“ и за извршен директор надлежен за секторот за маркетинг и дигитално банкарство и секторот за меѓународно банкарство и средства и ликвидност.

Истовремено, Беркан Имери беше назначен за член на Управниот одбор на „Халк банка“, кој како извршен директор е надлежен за секторот за управување со ризици и финансиско управување, секторот за следење кредитен ризик, наплата на ризични побарувања и правни работи и за секторот за човечки ресурси и организација.

Комерцијална банка

Погледнете ја галеријата

Комерцијална банка

Погледнете ја галеријата

Комерцијална банка

Погледнете ја галеријата

Комерцијална банка

Погледнете ја галеријата

Комерцијална банка

Погледнете ја галеријата

 

Претходно, во 2022 година беше „збогатен“ и Управниот одбор на „Комерцијална банка“, кој доби два нови члена и денес го сочинуваат пет лица. Тогаш во Управниот одбор, кој долги години го сочинуваа Хари Костов, претседател на УО и главен извршен директор, Илија Илоски, член на УО и главен оперативен директор, и Маја Ставкова Штериева, членка на УО и главна финансова директорка, како нови членови се придружија Билјана Максимовска-Поповиќ, која ја извршува функцијата главна директорка за корпоративно банкарство, и Никола Џамбазовски, кој ја извршува функцијата главен директор за продажба и развој.

Колку заработуваат менаџерите во големите банки?

Клучните менаџери во големите македонски банки вообичаено, освен плата, земаат и варијабилни надоместоци во зависност од успешноста во работењето и од други параметри. „Блумберг Адрија“ веќе пишуваше дека во текот на 2023 година на пет члена во Управниот одбор на „Комерцијална банка“ на бруто-основа им се исплатени вкупно 119,3 милиони денари (1,9 милион евра) по основ на плати, плата од деловна успешност, регрес, новогодишен надоместок, јубилејни награди, стручно усовршување, менаџерско осигурување, систематски прегледи и приватно здравствено осигурување, од кои 66,3 милиони денари (1,07 милион евра) претставуваат фиксен и 53 милиони денари (861.000 евра) претставуваат варијабилен надоместок, во согласност со политиката за наградување.

„НЛБ банка“ лани на тројца членови на Управниот одбор им исплатила вкупен бруто-надоместок од 38,2 милиони денари (622.000 евра), од кои 26 милиони денари (423.000 евра) како фиксен дел, а преостанатите 12,2 милиони денари (198.000 евра) како варијабилен дел.

„Стопанска банка Скопје“ на четири члена на Управниот одбор во 2023 година им исплатила вкупен бруто-износ од 31,8 милион денари (518.000 евра), од кои 25,9 милиони денари (421.000 евра) како фиксен износ и 5,9 милиони денари (97.000 евра) како варијабилен износ.