Нема зима за македонските блучипови: Над 237 милиони евра профит за девет месеци

Седум од десет компании што се дел од македонскиот берзански индекс МБИ10 остварија раст на добивката заклучно со третиот квартал од 2025 година споредено со истиот период претходната година, а кај трите преостанати намалувањето на профитот е незначително. Забележливо е дека трите друштва со намалена добивка се банки („Комерцијална банка“, „НЛБ банка“ и „ТТК банка“). Вкупната добивка на македонските блучипови за девет месеци изнесува над 237 милиони евра, а најголем удел во неа имаат банките. Во услови на геополитички тензии и трговска војна, ваквите резултати покажуваат дека компаниите од МБИ10 не се премногу засегнати од глобалните случувања и имаат потенцијал 2025 година да ја завршат со голем успех.

Огромни профити во банкарскиот сектор

„Комерцијална банка“ во периодот јануари-септември 2025 година оствари добивка од 4,25 милијарди денари (69,1 милиони евра), што е благо намалување во однос на истиот период претходната година, кога банката имаше добивка од 4,42 милијарди денари (71,9 милиони евра). И покрај незначителното намалување на добивката од 3,9 проценти, „Комерцијална банка“ е убедлив лидер по остварениот резултат меѓу банките и меѓу сите други компании што се дел од индексот МБИ10.

Во коментарот на резултатите од „Комерцијална банка“ посочија дека планираната бруто-добивка за трите квартали од годинава е остварена со 110 проценти.

„Позитивниот  резултат од работењето е остварен во услови на нагласени ризици од надворешното опкружување, особено зголемените геополитички тензии, осцилациите на светските  пазари како резултат на неизвесноста од воведените тарифи од страна на САД, како и намалената економска активност на главните трговски партнери на државата“, наведуваат од банката.

Оттаму додаваат дека остварената добивка пред исправка на вредност, која претставува показател за  оперативната способност на банката да ги покрива расходите од работењето, е за 4,8 проценти пониска во однос на истиот период минатата година.

„Намалувањето на добивката пред исправка на вредност главно произлегува од намалените останати приходи од дејноста (пред сè помал износ на наплатени претходно отпишани побарувања и помал износ на евидентирана капитална добивка од продажба на преземен имот во однос на  претходната година), a во помал обем и поради зголемените вкупни расходи од работењето, кои не ги надминуваат планските проекции“, информираат од „Комерцијална банка“.

Најголем удел во вкупната добивка на македонските блучипови имаат банките/Извор:Depositphotos

„НЛБ банка“ заклучно со третиот квартал годинава оствари добивка од 2,50 милијарди денари (40,7 милиони евра), што е намалување во однос на истиот период минатата година, кога банката имаше добивка од 2,71 милијарди денари (44,1 милиони евра). Од банката информираа дека вкупните оперативни трошоци се зголемени за 6,8 проценти, при што трошоците за вработени се повисоки за 9,2 проценти, преостанатите расходи од дејноста се пониски за 1,7 проценти, а амортизацијата е зголемена за 37,3 проценти во однос на истиот период претходната година.    

„‘НЛБ банка’ и понатаму ќе дејствува во насока на поддршка на приватниот сектор во земјата, како кај компаниите така и кај домаќинствата, со што ќе продолжи со испорака на значајна финансиска поддршка на економијата во целина. Притоа, банката и понатаму ја има водечката позиција на полето на дигитализацијата, технолошките иновации, примената на вештачката интелигенција и силната посветеност кон заштита на животната средина и социјалните аспекти“, наведуваат од „НЛБ банка“. 

„Стопанска банка - Скопје“ во периодот јануари-септември годинава оствари добивка од 2,86 милијарди денари (46,6 милиони евра), што е зголемување во однос на истиот период минатата година, кога банката имаше добивка од 2,78 милијарди денари (45,3 милиони евра).

Во однос на очекувањата за претстојниот период, од банката коментираат дека нашата држава како мала и отворена економија е многу осетлива на промените што се случуваат на глобалната сцена и дека најновите прогнози за светската економија за периодот 2025–2026 се ревидирани надолу во споредба со претходните процени, што укажува на посилно забавување на економскиот раст оваа година.

„Ризиците за растот се зголемени, додека за главни причинители се наведуваат засилениот протекционизам и зголемената неизвесност во трговските политики. Се предвидува дека побавното надолно приспособување на инфлацијата од очекувањата ќе има неповолно влијание врз финансиските услови, со што се зголемуваат ризиците поврзани со фискалната и финансиската одржливост“, посочуваат од банката.

Оттаму додаваат дека, од друга страна, евентуалното намалување на трговските пречки, спроведувањето на регулаторните реформи со кои би се намалил финансискиот товар на фирмите и на домаќинствата, решавањето на воените конфликти и посилното намалување на цената на нафтата се фактори што може да придонесат за повисок светски раст.

„ТТК банка“ во деветте месеци од годинава оствари добивка од 76,8 милиони денари (1,24 милион евра), што е благо намалување во однос на истиот период минатата година, кога добивката на банката изнесуваше 78 милиони денари (1,26 милион евра).

„Во наредниот период банката ќе биде насочена кон обезбедување стабилно и профитабилно оперативно работење. ‘ТТК банка’ АД Скопје и понатаму ќе дејствува во насока на поддршка на населението и на компаниите, водена од приматот за ефикасна и квалитетна клиентска услуга и клиентско задоволство. Банката ќе продолжи да инвестира во напредни технолошки решенија, модерна инфраструктура и безбедносни системи, а со цел да понуди иновативни, достапни и сигурни банкарски услуги приспособени на современите потреби на клиентите“, соопшти банката во коментарот на финансиските резултати.

Раст кај „Македонски телеком“ и „Македонијатурист“

„Македонски телеком“ оствари добивка од 1,88 милијарда денари (30,5 милиони евра) во периодот јануари-септември годинава, што е зголемување од 15 проценти во однос на истиот период претходната година, кога компанијата имаше добивка од 1,63 милијарда денари (26,6 милиони евра). Оттаму информираа дека зголемувањето е резултат на намалените оперативни расходи и зголемените приходи од продажба, делумно компензирано со намалените финансиски приходи што произлегуваат од прикажувањето на објективната вредност на финансиските средства (акции во други македонски компании) искажани преку добивката. Во наведениот период компанијата бележи раст на приходите од продажба за 1,6 отсто.

 

„Во рамките на приходите од основниот бизнис се бележат благ раст од 0,6 проценти кај фиксните услуги и раст од 1,5 проценти во мобилниот сегмент споредено со истиот период од претходната година, додека приходите од системска интеграција бележат значително зголемување од 28,6 проценти“, посочија од компанијата.

„Македонијатурист“ заклучно со третиот квартал годинава оствари добивка од 202,3 милиони денари (3,2 милиони евра), што е зголемување за 27 проценти во однос на истиот период претходната година, кога добивката на компанијата изнесуваше 159,7 милиони денари (2,5 милиони евра). Од компанијата информираа дека освен приходи од основната дејност - хотелски и ресторански услуги, остваруваат приходи и од вложувања во краткорочни хартии од вредност - удели во отворени инвестициски фондови, како од сопственички и должнички хартии од вредност во странски правни лица.

Одлични резултати на двете компании од фармацијата

„Алкалоид“ заклучно со септември годинава оствари консолидирана добивка во износ од 1,48 милијарда денари (24,1 милиони евра), што е зголемување од осум проценти во однос на истиот период претходната година, кога добивката на компанијата изнесуваше 1,38 милијарда денари (22,4 милиони евра).  

„Трендот на работење во отежнати економски услови, кои беа актуелни во изминатите неколку години, продолжи и во 2025 година. Доминанти предизвици беа инфлацијата и порастот на каматните стапки, кои, сепак, според сите очекувања, би требало да влезат во зоната на стагнација, а можеби и на благо опаѓање. Секако, глобалните безбедносни кризи ги отежнуваат економскиот амбиент и предвидливоста, што секогаш може да повлијае и врз цените на енергентите, да создаде тешкотии во синџирите на испораки, но и да повлијае врз достапноста на одредени материјали“, наведуваат од компанијата во коментарот за финансиските резултати.

Континуиран раст на двете компании од фармацијата што се дел од МБИ10/Извор: Depositphotos

Дополнително, додаваат оттаму, потенцијалниот ризик од глобална трговска војна може да предизвика нови покачувања на цените на суровините и да доведе до зголемени трошоци во работењето.

„Внимателно го следиме развојот на настаните и преземаме мерки за ублажување на овие потенцијални ефекти. Очекуваме во 2025 година да продолжиме по патеката на континуираниот раст базиран на можностите од нашите тековни инвестиции во нови производствени капацитети и опрема и од вложувањата во развојно истражувачки проекти, на тој начин создавајќи конкурентно портфолио и можности за ширење на пазарите. За остварување на овие цели ќе продолжиме и со нови вработувања во земјава, но и на странските пазари, притоа континуирано вложувајќи во подигнувањето и во усовршувањето на нивото на знаења и на вештини на нашите вработени и во градењето таленти“, соопшти компанијата.

Значително зголемување на добивката во деветте месеци од 2025 година споредено со истиот период претходната година бележи и „Реплек“. Имено, компанијата годинава заклучно со септември има консолидирана добивка од 239,1 милиони денари (3,8 милиони евра), што е зголемување од дури 77 проценти во однос на истиот период минатата година, кога компанијата имаше добивка од 135,4 милиони денари ( 2,2 милиони евра). Оттаму информираа дека во изминатиов период се отворени претставништва во Босна и Херцеговина и во Србија и дека двата пазара веќе го потврдиле потенцијалот, со успешно стартувани активности и реализирани први продажби во текот на годината. Од „Реплек“ посочија и дека го прошириле производственото портфолио.  

„Пет нови производи беа успешно лансирани во текот на 2025 година, потврдувајќи ги иновативноста и флексибилноста на компанијата. До крајот на годината се очекува портфолиото дополнително  да се збогати со производи насочени кон подобрување на здравјето и добросостојбата на пациентите и потрошувачите“, соопшти компанијата.

Како работеа „Макпетрол“ и „Гранит“?

„Макпетрол“ во периодот јануари-септември годинава оствари добивка од 919,3 милиони денари (14,9 милиони евра), што претставува зголемување од 15 проценти во однос на истиот период минатата година, кога компанијата имаше добивка од 802,7 милиони денари (13 милиони евра).

Подобрување на резултатот бележи и „Гранит“. Компанијата во наведениот период оствари добивка од 169,8 милиони денари (2,7 милиони евра), што е зголемување за 21 процент во однос на истиот период минатата година, кога добивката на компанијата изнесуваше 140,6 милиони денари (2,2 милиони евра).