Високиот старт во 2025 ветува мирно лето за македонските блучипови

Седум од десет компании кои се дел од македонскиот берзански индекс МБИ10 остварија раст на добивката во првите три месеци од годинава споредено со истиот период минатата година, а кај трите останати намалувањето на остварениот профит е незначително. Во услови на нови геополитички тензии и закани за трговска војна ваквите резултати покажуваат дека македонските блучипови не се премногу засегнати од глобалните случувања и дека имаат потенцијал 2025 година да ја завршат со поголем успех отколку претходната година.

Банките на пат на нови рекорди

„Стопанска банка Скопје“ во првите три месеци од годинава оствари добивка од 833,5 милиони денари (13,5 милиони евра), што е благо намалување во однос на истиот период минатата година кога добивката изнесувала 861,9 милиони денари (14 милиони евра).

Во коментарот на остварените резултати од банката посочија дека домашната економијата во анализираниот период продолжи да се справува со сериозни предизвици, но истовремено и со потенцијал за раст и стабилност.

Во однос на очекувања за претстојниот период оттаму велат дека глобалната економија и натаму закрепнува, при пониска инфлација и поповолни финансиски услови.

„По серијата кризи, глобалниот раст се стабилизира и се очекува дека во наредниот период ќе ја следи сегашната динамика. Сепак, преовладува зголемената геополитичка неизвесност, поради војните и конфликтите, како и евентуалните трговски санкции, особено со последните одлуки на американската администрација поврзана со царините, кои, секако, ќе имаат директни или индиректни ефекти врз компаниите од домашната економија кои се увозно-извозно ориентирани“, наведуваат од банката.

Оттаму додаваат дека евентуалното засилување на геополитичките тензии би можело да ги наруши енергетските пазари и синџирите на снабдување, што би можело да ја зголеми инфлацијата, а би ја намалило економската активност.

„Во домашната економија, ризиците за економските изгледи на краток рок и понатаму се претежно надолни, главно поврзани со геополитичките тензии, со потенцијал за нарушувања на енергетските пазари и пазарите на примарни прехранбени производи, но и со динамиката и интензитетот на остварувањето на домашните инфраструктурни проекти“, велат од банката.

Банките очекуваат раст на кредитирањето/Извор: Depositphotos

„Комерцијална банка“ во првиот квартал од годинава оствари позитивен финансиски резултат во износ од 1,4 милијарди денари (23 милиони евра) наспроти остварениот позитивен финансиски резултат во истиот период минатата година во износ од 1,1 милијарда денари (19,1 милиони евра), што претставува зголемување за 20,1 проценти.

„Планираната бруто-добивка за првиот квартал од годинава е остварена со 110 проценти. Позитивниот резултат од работењето е остварен во услови на нагласени ризици од надворешното окружување, особено зголемените геополитички тензии, осцилациите на светските пазари како резултат на неизвесноста од воведените тарифи од страна на САД, како и намалената економска активност на главните трговски партнери на државата“, наведуваат од банката во коментарот на остварените резултати.

Дополнително, од банката посочуваат дека „домашната инфлација забележа одредено забрзување во првиот квартал (достигна 5 проценти и 4,2 проценти на годишно ниво во февруари и март), што влијаеше Народната банкада ја води монетарната политика на претпазлив начин“.

Во однос на очекувањата за претстојниот период оттаму велат дека макроекономските услови во кои банката ја остварува својата активност во текот на 2025 година се условени од домашните политички случувања и од неизвесниот и непредвидлив глобален амбиент.

Во периодот од 01.01.2025 до 31.03.2025 година „НЛБ Банка“ оствари нето добивка во износ од 719,4 милиони денари (11,6 милиони евра), што претставува зголемување за 6,1 проценти во однос на истиот период од претходната година кога добивката изнесувала 678,2 милиони денари (11 милиони евра).

„Ваквиот резултат се должи на успешното спроведување на деловната стратегија во сите сегменти од работењето на банката. ‚НЛБ Банка‘е системски значајна банка согласно одлуката за методологијата за идентификување системски значајни банки на Народната банка, со силна пазарна позиција и висок пазарен удел во банкарскиот сектор“, наведуваат од банката.

„ТТК Банка“ во првите три месеци од годинава реализира добивка од 10,5 милиони денари (171.000 евра) што е зголемување во однос на истиот период минатата година кога добивката изнесувала 4,2 милиони денари (69.000 евра).

„Во анализираниот период, во услови на закрепнување на глобалниот раст, но со тензии од глобалната трговија и трговската фрагментација, динамичниот пазар и силната конкуренција, ‚ТТК Банка‘ АД Скопје генерираше позитивен финансиски резултат кој се темели на ефикасниот и традиционален деловен модел, како и на реализацијата на поставените стратешки цели за ефикасно функционирање, засновани на контролиран одржлив раст“, посочуваат од банката.

За очекувања за претстојниот период, од банката укажуваат дека проекциите за глобалната економија упатуваат на нејзин стабилен раст, но ризиците поврзани со можната ескалација на геополитичките тензии и неизвесноста од трговските политики, со потенцијални ефекти и врз инфлацијата, можат да предизвикаат забавување на започнатиот процес на монетарно олабавување, со неповолно влијание врз фискалната и финансиската одржливост.

Како работеа „Македонијатурист“ и „Македонски Телеком“?

„Македонијатурист“ во анализираниот период оствари добивка од 37,1 милиони денари (604.000 евра), што е значително зголемување во однос на првите три месеци од 2024 година кога добивката изнесувала 2,3 милиони денари (37.000 евра).

Компанијата во текот на трите месеци од 2025 извршила нови вложувања во износ од 14,8 милиони денари (241.000 евра) во градежните објекти, за набавка на опрема и за одржување на постојната опремата во своите објекти.

„Друштвото постојано своите инвестициски активности во континуитет ги насочува кон реновирање и модернизација на постојните хотелски и ресторански капацитети, кон подобрување на условите за работа, почитување на протоколите за заштита на здравјето, спроведување на новите законски регулативи и задолжително спроведување на нови стандарди за брендираните хотели и тековно одржување“, наведуваат од компанијата.

„Имајќи во предвид дека друштвото работи во неизвесни услови за работа, главните активности на друштвото ќе бидат насочени кон што е можно поефикасно користење на ресурсите со кои располага, почитување на здравствените протоколи за заштита на здравјето на гостите и вработените, намалување на трошоците, се со цел да се подоби финансискиот резултат во наредниот период“, наведуваат од компанијата.

„Македонски Телеком“ во првите три месеци од годинава оствари добивка од 542,4 милиони денари (8,8 милиони евра), што е на речиси исто ниво како и во првиот квартал од претходната година кога добивката изнесувала 550,6 милиони денари (8,9 милиони евра).

„И во првото тримесечје од 2025 година фокусот останува на најмодерните технологии и најдобро корисничко искуство. Продолжуваме со солидни финансиски резултати, силни инвестиции со кои се гради клучна инфраструктура и се забрзува дигитализацијата на земјата. И покрај сите глобални економски предизвици и во 2025 година продолжуваме со стратегијата за силни инвестиции за да го обезбедиме најдоброто за нашите корисници, посветени да изградиме поврзано дигитално општество за сите. Резултатите се мотив да продолжиме посветено да работиме да останеме лидери во индустријата и силно посветени на нашите корисници“, истакна Никола Љушев, главен извршен директор на компанијата во коментарот на остварените резултати.

Одлични резултати на двете компании од фармацијата

„Алкалоид“ во првиот квартал од годинава оствари консолидирана добивка од 491,7 милиони денари (7,9 милиони евра), што е зголемување во однос на истиот период минатата година кога добивката изнесувала 479,5 милиони денари (7,7 милиони евра).

„Бизнис-планот за 2025 година, донесен со одлука на Управниот одбор на ‚Алкалоид‘ АД Скопје на седницата одржана на 27.12.2024 година, предвидува инвестирање на околу 8 проценти од консолидираните приходи од продажби во материјални и во нематеријални средства, раст од 8 проценти на консолидираните продажби во однос на реализираните во 2024 година, како и раст од 7 проценти на консолидираниот профит пред оданочувањето во однос на 2024 година“, посочуваат од компанијата.

„Алкалоид“ и „Реплек“ со амбициозни планови за ширење на странските пазари/Извор: Depositphotos

Од „Алкалоид“ додаваат дека трендот на работење во отежнати економски услови, кои беа актуелни во изминатите неколку години, сосема е извесно дека ќе продолжи и во 2025 година.

„Доминанти предизвици беа инфлацијата и порастот на каматните стапки, кои, сепак, според сите очекувања, би требало да влезат во зоната на стагнација, а можеби и на благо опаѓање. Секако, глобалните безбедносни кризи ги отежнуваат економскиот амбиент и предвидливоста, што секогаш може да повлијае и врз цените на енергенсите, да создаде тешкотии во синџирите на испораки, но и да повлијае врз достапноста на одредени материјали. Дополнително, потенцијалниот ризик од глобална трговска војна може да предизвика нови покачувања на цените на суровините и да доведе до зголемени трошоци во работењето. Внимателно го следиме развојот на настаните и преземаме мерки за ублажување на овие потенцијални ефекти“, наведуваат од компанијата.

Оттаму очекуваат во 2025 година да продолжат по патеката на континуираниот раст базиран на можностите од тековните инвестиции во нови производствени капацитети и опрема и од вложувањата во развојноистражувачки проекти, на тој начин создавајќи конкурентно портфолио и можности за ширење на пазарите.

„За остварување на овие цели ќе продолжиме и со нови вработувања во земјава, но и на странските пазари, притоа континуирано вложувајќи во подигнувањето и во усовршувањето на нивото на знаења и на вештини на нашите вработени и во градењето таленти“, велат од компанијата.

„Реплек“ во првото тромесечје од 2025 година оствари консолидирана добивка од 56,5 милиони денари (920.000 евра), што е значително зголемување во однос на истиот период минатата година кога добивката изнесувала 22,8 милиони денари (372.000 евра).

Од компанијата информираа дека порастот на приходите од продажба во сегментот фармација изнесува 26 проценти и дека е евидентен како на домашниот така и на странските пазари.

„Вкупните приходи од продажба на странските пазари во првиот квартал од 2025 година изнесуваат 370 милиони денари (6 милиони евра) истите се зголемени за 18,5 проценти во однос на истиот период минатата година. Вкупните приходи од продажба на домашен пазар изнесуваат 110 милиони денари (1,8 милиони евра) истите се зголемени за 61 процент во однос на истиот период во 2024 година“, наведуваат од компанијата.

Блад пад кај „Гранит“, расте добивката на „Макпетрол“

Градежната компанија „Гранит“ во периодот јануари - март 2025 година оствари добивка од 3,6 милиони денари (58.585 евра), што е намалување во однос на истиот период претходната година кога добивката изнесувала 5,9 милиони денари (96.800 евра).

„Со оглед на вкупната економска состојба во државата очекувањата за наредниот период се добивање на нови проекти од областа на градежната инфраструктура преку нови тендери и побрзо завршување на постоечките тендерски процедури“, соопшти компанијата во коментарот на остварените резултати.

Единствената нафтена компанија од МБИ10 - „Макпетрол“ во првиот квартал од годинава оствари добивка од 171,1 милиони денари (2,7 милиони евра), што е зголемување во однос на истиот период од петходната година кога добивката изнесувала 164,1 милиони денари (2,6 милиони евра).