Раст на бројот на вработени и на продуктивноста кај македонските банки

Бројот на лицата вработени во банкарскиот систем на 31.12.2023 година изнесува 5.907 и бележи зголемување за 77 во однос на претходната година, покажуваат новите податоци на Народната банка објавени во извештајот за ризиците во банкарскиот систем за 2023 година. 

„Според степенот на завршено образование, квалификациската структура на вработените бележи подобрување, па така учеството на вработените со завршено најмалку високо образование изнесува 86,6 проценти, што е повеќе за 0,6 процентни поени на годишна основа“, наведуваат од Народната банка.

Оттаму посочуваат дека продуктивноста на банкарскиот систем бележи зголемување, што се должи на повисокиот раст на активата од бројот на вработени. 

„Зголемување на продуктивноста бележат сите анализирани банки, а половината од нив бележат двоцифрени стапки на раст. Разликите во продуктивноста меѓу банките и натаму се значителни и се движат во границите од 29,4 милиони денари кај банката со најниска продуктивност до 211,6 милиони денари средства по вработен кај банката со највисока продуктивност“, укажуваат од Народната банка.

Опаѓа бројот на деловни единици

Македонскиот банкарски систем го сочинуваат петнаесет депозитни институции, односно тринаесет банки и две штедилници. Банкарската мрежа е распространета низ речиси сите градови во земјата и лани се состоела од 376 деловни единици.

„Вкупниот број деловни единици и натаму опаѓа и во споредба со претходната година е намален за 6 единици, а ваквата промена е рамномерна во сите плански региони во земјата“, наведуваат од Народната банка.

Според податоците на централната банка, најголемиот дел од вкупниот број деловни единици (43,9 проценти) се наоѓаат во Скопскиот Регион, каде што физичкиот пристап до банкарските услуги е најлесен, додека најтежок пристап до банкарските услуги е забележан во Североисточниот и Полошкиот Регион.

„Притоа, поизразено влошување на пристапот до банкарските услуги се забележува во Североисточниот и Југоисточниот Регион, додека пристапот во Полошкиот Регион се подобрува во споредба со претходната година“, посочуваат од Народната банка.

Услуги по електронски пат

Оттаму укажуваат дека сепак, треба да се има предвид дека физичкиот пристап е само една мерка на вкупниот пристап до банкарските услуги затоа што банките некои од своите услуги исто така ги нудат по електронски пат.  

„Mоже да се забележи дека расте учеството на платежните сметки коишто имаат можност за користење онлајн банкарски услуги (увид во извештаи и/или плаќања), иако е намален уделот на сметките коишто активно се користат за овие намени“, информираат од Народната банка.