Три банки имаат поголем профит од сите други компании на берзата

Во првиот квартал од 2024 година од 89 компании од Македонската берза што објавиле финансиски извештаи, 66 работеле со добивка, а 23 со загуба, што е подобрување во однос на истиот период минатата година, кога со добивка работеле 63 друштва, а загуба имале 27 друштва.

Тоа се пресликува и во вкупниот финансиски резултат на компаниите од берзата, кој во првите три месеци од годинава е позитивен и изнесува 76,5 милиони евра, што е зголемување за 16,1 проценти во однос на првото тримесечје од 2023 година, кога вкупната добивка изнесувала 65,9 милиони евра.

Карактеристично за овој период од годината е што добивката на трите најголеми банки што котираат на берзата е поголема отколку добивката на сите други компании. Имено, „Комерцијална банка“, „НЛБ банка“ и „Стопанска банка Скопје“ во првиот квартал заеднички имаат добивка од 44 милиони евра, што е 57,7 проценти од вкупната добивка на сите компании од берзата.

И покрај тоа, впечаток е дека почетокот на годината не тргна баш најдобро за друштвата од банкарскиот сектор со оглед на тоа што повеќето банки што котираат на берзата во првиот квартал имаат остварено помала добивка во однос на истиот период минатата година. Всушност, само „Комерцијална банка“ (+13,4 проценти) и „Стопанска банка Скопје“ (+23,3 проценти) бележат зголемување на добивката, а помала добивка имаат „НЛБ банка“ (-15,48 проценти), „УНИ банка“ (-34,9 проценти), „Централна кооперативна банка“ (-43 проценти) и „ТТК банка“ (-73,9 проценти). Единствена банка што работела со загуба во првиот квартал од годинава е „Стопанска банка Битола“, која за три месеци покажува минус од 51,7 милион денари, што е на речиси исто ниво како и во првите три месеци од 2023 година.

При анализата на поединечните резултати паѓаат во очи неколку компании што во првиот квартал од годинава прикажуваат драстично зголемување на добивката во однос на истиот период минатата година. Такви се „Жито лукс“, со раст на добивката од 1.367 проценти, „Раде Кончар – Апаратна техника“ (+1.068 проценти), „Мода“ АД Свети Николе (+804 проценти) и „Гранит“ (+794 проценти). Сепак, високиот процентуален пораст треба да се земе предвид со резерва бидејќи во сите случаи има многу ниска споредбена база од минатата година. Дополнително, станува збор за резултати за само три месеци, што значи дека е можно да има големи промени до крајот на годината.  

 

 

Во моментов нема коментари за веста. Биди прв да коментира...

Остави коментар