Колку заработува НЛБ од активен клиент?

По минатогодишниот рекорден профит, и најголемата словенечка банка Нова љубљанска банка (НЛБ) во првиот квартал ги надмина плановите и оствари нето-добивка од 140 милиони евра. Притоа, приходите достигнаа речиси 300 милиони евра. Групацијата НЛБ има повеќе од 2,8 милиони активни корисници, а заклучокот е дека приходот по активен клиент денес е 270 евра.

Амбициите на НЛБ се уште поголеми - во 2030 година очекуваат приходот по активен клиент да надмине 400 евра. Во исто време, според прогнозите, бројот на клиенти нема да се зголеми значително. Групацијата проценува дека до 2030 година ќе порасне до два отсто.

 

 

Ова е само една од целите на деловната стратегија до 2030 година, која НЛБ вчера ја претстави пред акционерите. Меѓу другото, групацијата сака да создаде приближно 50 милијарди евра вкупни средства, две милијарди евра приход и една милијарда профит. За споредба: ланскиот рекорден профит надмина 550 милиони евра, а нето-приходот беше 1,1 милијарда евра.

Годинава, наместо приближно 1,1 милијарда евра, се очекува приходите на НЛБ групацијата да пораснат на 1,2 милијарда евра, што се очекува да се достигне и во 2025 година. Прогнозата беше ревидирана нагоре и покрај тоа што, според прогнозите, Европската централна банка (ЕЦБ) наскоро ќе почне да ја олабавува монетарната политика.

Во кварталниот извештај, НЛБ подготви оцена за чувствителноста на промените на каматните стапки на нето-каматниот приход. Доколку се остварат прогнозите на економистите и се намалат клучните каматни стапки за, на пример, 50 базични поени, нето-приходот од камати на НЛБ би можел да биде помал за 43,5 милиони евра.

 

 

Со поставените повисоки деловни цели, ќе се смеат и акционерите. При објавувањето на резултатите за првиот квартал банката најави и исплата на 220 милиони евра дивиденда, што е 100 отсто зголемување во однос на исплатата во 2023 година.

Бродњак гледа можности и во Србија

Според Блаж Бродњак, првиот човек на НЛБ, Словенија ќе остане главен мотор на генерирање приходи, а Бродњак гледа голем потенцијал за раст и на овој пазар. „Ако се погледнат долгот на домаќинствата во однос на БДП, корпоративниот долг во однос на БДП и бројот на клиенти што успеавме да ги убедиме да инвестираат во инвестициски фондови за 22 години - постои троен потенцијал за раст“, ​​смета Бродњак.

Според него, ќе следуваат и други земји од регионот Адрија во кои е присутна НЛБ. „Србија брзо ќе биде следна, бидејќи се очекува просечната нето-плата да надмине илјада евра за две години. Со тоа се зголемува фондот на потенцијални клиенти“, убеден е претседателот на Управниот одбор на НЛБ. Тие веќе имаат најактивни клиенти (повеќе од милион) и најмногу филијали во Србија. За споредба, на словенечкиот пазар има речиси 720 илјади активни клиенти.

Според Бродњак, српскиот пазар се искачува речиси на нивото на словенечкиот пазар во однос на вкупните приходи, но Хрватска недостига во мозаикот на бизнисот во регионот. „Долгорочно, би било идеално да имаме четири деловни столба: Словенија, Хрватска, Србија и други земји, од кои секоја би сочинувала околу една четвртина“, смета Бродњак.

Дали НЛБ ќе биде присутна во Хрватска до 2030 година?

„Десет години работиме за да влеземе на хрватскиот пазар. Поминаа 30 години мака и мислам дека сега на генерациите во двете земји им е прекуглава од ова прашање. Конечно мора да ги отстраниме овие пречки. Ако се потребни уште пет години, и тоа е добро, но еден ден ќе бидеме присутни во Хрватска“, убеден е Бродњак.

Во ноември минатата година НЛБ склучи купопродажен договор за купување на 100 отсто од „СЛС холдико“, матичната компанија на „Самит лизинг Словенија“ и нејзините подружници. Тие индиректно станаа сопственици на „Мобил лизинг“, кој има дозвола за работа на хрватскиот пазар.

„Апликацијата е поднесена до регулаторните органи во Хрватска, конечната одлука ја очекуваме за неколку недели. Затоа веруваме дека влез во Хрватска ќе се овозможи прво за лизинг-бизнисот, а потоа има можности за индиректен влез во банкарството“, оцени првиот човек на НЛБ.

СТА

Денес, според него, сè уште е рано за директен влез на банкарскиот пазар на нашите јужни соседи, а тие бараат цели за преземање и во Албанија. „Дополнителни можности за консолидација на пазарот низ земјите во регионот остануваат отворени. Оваа игра сè уште не е завршена. Ние сме доволно силни и подготвени да бидеме ’консолидатори’ на пазарот“, рече Бродњак.

До 2030 година петтина вработени помалку

Секоја година се намалува и бројот на вработени и филијали во НЛБ групацијата. Минатата година имаше нешто помалку од осум илјади вработени и 418 филијали. Неодамна само во Словенија беа собрани необврзувачки понуди за 17 деловни простории.

Колкав ќе биде оптималниот број на вработени во банката во 2030 година? „Во Словенија 600 од 2.600 вработени ќе заминат во пензија за три години. Нема да можеме да ги замениме, дури и да сакаме“, оценува Бродњак. Претпоставката на банката е дека во следните шест години во банката ќе работат петтина помалку луѓе.

Тоа ќе се обидат да го постигнат и преку дигитализација. Уделот на дигиталната употреба кај клиентите останува релативно мал, помеѓу 39 и 60 проценти. Се очекува тој да се зголеми на најмалку 80 проценти до 2030 година. „Дигитализацијата не значи ништо повеќе од преместување на бизнисот од многу скапи физички на поевтини дигитални канали“, објасни членот на одборот на НЛБ Арчибалд Кремсер.

Соодносот на трошоците (CIR) во моментов е 46 проценти, но до 2030 година треба да падне под 45 проценти, НЛБ си постави цел.