„НЛБ Банка“ лани оствари добивка од 53,5 милиони евра

„НЛБ Банка“ лани оствари нето добивка во износ од 3,2 милијарди денари (53,5 милиони евра), што претставува зголемување за 2,4 проценти во однос на претходната година кога банката имаше добивка од 52,3 милиони евра, покажува неревидираниот биланс на успех на банката објавен преку Македонската берза.

Вкупните кредити кај небанкарскиот сектор на 31.12.2024 година изнесуваат 84,1 милијарди денари (1,3 милијарди евра) и бележат зголемување од 13,6 проценти во однос на крајот од 2023 година.

„Зголемувањето произлегува од постигнатиот значаен раст на кредитната активност од 9,7 проценти во сите сегменти од кредитирањето на население, како и во делот на кредитирањето на компаниите каде е остварен раст од високи 18,8 проценти“, информираат од банката. 

Оттаму додаваат дека вложувањата во хартии од вредност се зголемени за 30,3 проценти во однос на 31.12.2023 година поради поголемо вложување во државни обврзници и државни записи што е директен резултат на зајакната депозитна активност и силната ликвидносна позиција на банката.

„Вкупните депозити (депозити на комитенти и депозити на банки) изнесуваат 107,2 милијарди денари (1,7 милијарди евра) и во однос на 31.12.2023 година се зголемени за 15,5  проценти како резултат на зголемување на тековните сметки и орочени депозити на домаќинства за 20,8 проценти и зголемување на тековните сметки на нефинансиски друштва за 17,8 проценти“, наведуваат од банката.

Нето каматните приходи, заклучно со 31.12.2024 година се повисоки за 16,9 проценти споредено со претходната година.

„Притоа, како резултат на зголемената кредитна активност на банката и повисокото кредитно портфолио, повисоки приходи од камата од вложувања во хартии од вредност, повисоки приходи од парични средства и парични еквиваленти како и резултатите од наплатата на претходно отпишани побарувања, приходите од камати се повисоки за 17,9 проценти во однос на претходната година“, велат од банката.

Истовремено, расходите за камати се повисоки за 26 проценти пред се, поради зголемената депозитна активност и растот на депозитната база на банката. Нето приходите од провизии се повисоки за 16,8 проценти споредено со претходната година, при што приходите од провизии се зголемени за 2,3 проценти како резултат на повисоки приходи од платен промет, банкоосигурување, брокерски услуги, зголемени приходи од реализирани трансакции со картички и трансакции на ПОС терминали и картично порамнување и зголемени приходи од продажба на удели во фондови.

„Расходите за провизии се намалени за 15,1 проценти, главно поради пониски расходи од картично работење кон меѓународните картични системи и зголемената интерна ефикасност на банката“, наведуваат оттаму.

Вкупните приходи од работењето се повисоки за 15,5 проценти во однос на претходната година во најголем дел поради повисоки каматни приходи и пониски расходи за провизии и надомести.

„Во претстојниот период се очекува да се одржи макроекономската стабилност во земјата придружена со забрзаност на економски раст, натамошно намалување на инфлаторните притисоци и надолен тренд кај невработеноста. Рејтингот на земјата ‚ББ-‘ со стабилен изглед е потврден од агенцијата за кредитен рејтинг „Стандард и Пурс“, како резултат на веродостојните и конзистентни макроекономски политики кои го поддржуваат стабилниот девизен курс (де факто фиксниот девизен курс) на денарот во однос на еврото. Забрзувањето на растот на БДП се очекува да биде поттикнато од постепеното закрепнување на надворешната побарувачка и порастот на инвестициската активност“, наведуваат од банката.

Сепак, оттаму посочуваат дека неизвесност за идната макроекономска стабилност и понатаму постои преку ризиците поврзани со глобалните фактори и геополитичките настани.

„Во вакви околности ‚НЛБ Банка‘ и понатаму ќе делува во насока на поддршка на приватниот сектор во земјата, како кај населението така и кај компаниите со што ќе продолжи со испорака значаен придонес во однос на поддршката на целата економија“, велат од банката.