„НЛБ Банка“ оствари добивка од 26,6 милиони евра за шест месеци

„НЛБ Банка“ во првата половина од годинава оствари нето добивка во износ од 1,64 милијарди денари (26,6 милиони евра), што претставува зголемување за 13,1 проценти во однос на остварената нето добивка во истиот период претходната година.

„Зголемувањето се должи на континуирани продажни активности на кредитните продукти со посебен фокус на домаќинствата, микро, малите и средни претпријатија, зголемен број на корисници на платните сервиси на банката, како и позитивните трендови на финансиските пазари“, соопшти банката.

Во однос на билансот на успех, од банката информираат дека нето каматните приходи, заклучно со 30.06.2024 година се повисоки за 22,2 проценти споредено со претходната година, при што приходите од камати се повисоки за 24,3 проценти, пред се поради пораст на приходите од камата кај станбените и потрошувачките кредити на домаќинства, повисоки приходи од камата од вложувања во хартии од вредност и како резултат на наплатени претходни отпишани побарувања преку продажба на побарувања во првиот квартал од 2024 година. Расходите за камати се повисоки за 46,2 проценти пред се поради зголемување на висината на каматната стапка на орочените депозити на домаќинства.

„Нето приходите од провизии се повисоки за 16,2 проценти споредено со претходната година, при што приходите од провизии се зголемени за 3,3 проценти како резултат на повисоки приходи од работење со платежни сметки, банкоосигурување, зголемени приходи од реализирани трансакции со картички и трансакции на ПОС терминали и картично порамнување“, информираат од банката.

Расходите за провизии се намалени за 12,7 проценти, главно поради пониски расходи од картично работење кон меѓународните картични системи. Останатите некаматни приходи се намалени во однос на претходната година за 23,1 проценти. Вкупните приходи од работењето се повисоки за 15,4 проценти во однос на претходната година во најголем дел поради повисоки каматни приходи. Од друга страна, вкупните оперативни трошоци изнесуваат се зголемени за осум проценти, при што трошоците за вработени се повисоки за 7,7 проценти, трошоците за амортизација се пониски за еден процент, а останатите расходи од дејноста се повисоки за 10,5 проценти во однос на истиот период претходната година.

Очекувања

Од банката во претстојниот период очекуваат да се одржи макроекономската стабилност на државата, како резултат на забавувањето кај инфлација и умерениот раст на бруто домашниот производ. 

Позитивно влијание се очекува и од движењата кај каматните стапки на меѓународните и домашните финансиски пазари и респонзивноста на фискалната и монетарната политика кои се значајни за одржување на ликвидноста на компаниите, доходот на домаќинствата и севкупната економска активност.

„Сепак, неизвесност за идната макроекономска стабилност и понатаму постои преку ризиците поврзани со глобалните фактори и геополитички случувања. Во вакви околности ‚НЛБ Банка‘ и понатаму делува во насока на поддршка на приватниот сектор во земјата, со што има значаен придонес во макроекономскиот и финансискиот амбиент на државата. Притоа, банката и понатаму ја има водечката позиција во полето на дигитализацијата, технолошките иновации, примената на вештачката интелигенција и силната посветеност кон заштита на животната средина и социјалните аспекти“, наведуваат од „НЛБ Банка“.

Оттаму додаваат дека дигитализацијата во „НЛБ Банка“ се зајакнува преку унапредување на капацитетите на дигиталните канали со што се обезбедува повисоко ниво на достапност на банката и подобро искуство на клиентите како и поддршка на клиентите преку зајакнување на улогата на контакт-центарот.

„Дополнителен фокус е ставен и на проширување на палетата на производи и услуги преку продажбата на различни банкарски и небанкарски производи и зголемување на квалитетот на услугите со што се очекуваат уште подобри резултати во клучните сегменти од работењето на банката“, посочуваат од банката. 

Од „НЛБ Банка“ ги препознаваат ризиците од климатските промени и проактивно ги акцентираат „ЕСГ - зелените кредити“ – кредитирање во области за производство на електрична енергија од обновливи извори, намалување на загадувањето и подобрување на животната средина.

„Банката во континуитет обезбедува поддршка на стопанството преку проширување на понудата за стартап – компаниите и учество во раните фази од процесот на создавање на стартап-компаниите“, велат од банката.

Во моментов нема коментари за веста. Биди прв да коментира...

Остави коментар