Освен ако наскоро не се отвори Ормускиот Теснец, аргументите во корист на европските акции значително ќе ослабат, според стратези што биле анкетирани од „Блумберг“.
Најновата анкета покажува дека индексот Stoxx Europe 600 ќе ја заврши годината на 624 поени, што е помалку од еден отсто над сегашното ниво, според просекот од 16 прогнози. Иако таа просечна цел е речиси непроменета во однос на пред еден месец, предупредувањата од стратезите за растечки ризици за економијата на регионот и акциите поради војната во Иран и понатаму се засилуваат.
„Гледаме многу мал простор за раст во краток рок“, изјави стратегот на „Дојче банк“ (Deutsche Bank AG) Максимилијан Улер. „Со години инвеститорите беа премногу претпазливи и мораа да го бркаат растот, но овој пат сите веќе се прекумерно изложени. Ризиците постојат и не можеме да ги игнорираме.“
Откако го избришаа поголемиот дел од почетниот пад предизвикан од војната во Иран, европските акции стагнираат во последниот месец. Цените на нафтата над 100 долари за барел создаваат страв од раст на инфлацијата, што предизвикува остри скокови на приносите на обврзниците и ги тера трговците да вклучуваат во цените две-три зголемувања на каматните стапки од страна на Европската централна банка (ЕЦБ) до крајот на годината.
Улер од „Дојче банк“ ја задржа својата целна цена за индексот на 640 поени на крајот на годината, но нагласи дека ризикот од екстремни сценарија се зголемил на „непријатно“ ниво. Тој препорача инвеститорите да користат опции за заштита од остри падови на пазарот. „Колку подолго Ормускиот Теснец останува затворен толку е поголем ризикот од екстремни движења“, рече тој.
Генерално, опсегот на прогнози во анкетата на „Блумберг“ се стесни. Прогнозата на „Сисиете женерал“ (Société Générale SA) е најпесимистична со 580 поени или 6,5 отсто пад. ХСБЦ (HSBC Holdings Plc) останува најоптимистичка со цел од 670 поени, што значи околу 8 отсто раст.
Европските акции имаат многу малку преостанат раст оваа година
Просечната прогноза на стратезите е дека до крајот на годината ќе има раст од помалку од еден отсто.
Bloomberg
Европа завршува силна сезона на заработки, но растот на профитите е далеку од нивото во САД, а изгледите се влошуваат бидејќи притисоците врз корпоративните маржи растат. За разлика од тоа, силниот раст на заработките во САД, поттикнат од инвестиции во вештачка интелигенција, го турна индексот S&P 500 на нови рекорди.
Консензусот меѓу аналитичарите останува дека Европа ќе забележи двоцифрен раст на заработката по акција во 2026 година, најмногу поттикнат од енергетските акции и закрепнувањето на потрошувачкиот сектор. Но тоа сè повеќе изгледа премногу оптимистично.
„Европските акции се тргуваат блиску до историските врвови и само 3 отсто под нашите целни нивоа за крајот на годината“, изјави стратегот на „Ситигруп“ (Citigroup Inc.), Беата Мантеи. „Според нашите модели, европските акции сè уште ги ценат позитивните ревизии, додека заработките надвор од суровините и технологијата се изложени на ризик од дополнителни намалувања.“
Стратегот на „Соцген“ (SocGen), Роланд Калоијан, сега има најпесимистичка цел откако претходно најпесимистичките учесници, ТФС (TFS Derivatives) и Банката на Амрика (Bank of America Corp.), малку ги зголемија своите прогнози.
„Откако европските компании ги надминаа ниските очекувања во првиот квартал, очекуваме потежок период во следните квартали, бидејќи очекувањата се повисоки, а трошоците од конфликтот почнуваат да се чувствуваат“, рече Калоијан. „Изгледа дека фундаментите повторно се во прв план, а разликата во динамиката на заработката може да објасни зошто американските акции ги надминуваат европските.“
Економијата почнува да ги чувствува последиците од војната меѓу Иран. Бизнис-активноста во еврозоната се намали со најбрзо темпо во последните две и пол години, при што композитниот индекс на менаџерите за набавки на „Ес енд Пи глобал“ за регионот веќе втор месец по ред е во зона на контракција, покажуваат податоците објавени во четвртокот.
Сепак, има и знаци на отпорност, откако деловните очекувања во Германија се подобрија за првпат од почетокот на конфликтите на Блискиот Исток. Во тој контекст и по бран купување при пад, индексот Stoxx Europe 600 бележи најдобра недела во повеќе од еден месец, со раст од речиси 3 отсто.
Европски акции и процени за заработка
Процените за раст на профитот ја поддржаа берзата
Bloomberg
И покрај тоа, Европската комисија објави нови мрачни прогнози за раст и инфлација. Економскиот раст во 2026 година ќе изнесува 0,9 отсто, што е помалку од 1,4 отсто раст минатата година и 0,3 процентни поени под претходните очекувања од ноември. Инфлацијата се очекува да изнесува просечно 3 отсто во 2026 година, значително над претходната прогноза од 1,9 отсто и над целта од 2 отсто на Европската централна банка.
„Како што растот на БДП забавува, ценовната моќ се намалува, а фиксните трошоци стануваат потешки за апсорпција, што врши притисок врз маржите - особено во средина на растечка инфлација“, изјавија стратези од „Голдман Сакс“ (Goldman Sachs Group Inc). „Врз таа основа, очекуваме нето-маржите на Stoxx 600 да бидат намалени за околу 100 базични поени.“
Што велат стратезите од „Блумберг интелиџенс“:
„Резултатите за првиот квартал во Европа ги надминуваат очекувањата, предводени од енергијата и технологијата, но реакцијата на цените на акциите покажува попребирлив пазар. Дневните приноси, во однос на Stoxx 600, укажуваат дека инвеститорите повеќе се фокусираат на одржливост на заработката и насоките, додека геополитичките ризици растат. Ревизиите на EPS процените за 2026 година покажуваат дека циклусот на подобрување е сè повеќе концентриран во суровинските сектори и технологијата, оставајќи го поширокиот пазар изложен на ризик од слабеење на замавот.“
- Лоран Дуеје, виш стратег за акции
Според анкетата на Банката на Америка меѓу менаџери на фондови, нето 4 отсто од инвеститорите сега имаат помала изложеност на европски акции во однос на глобалните пазари. Тоа е првпат од декември 2024 година да се забележи ваква намалена изложеност (underweight) и претставува остар пресврт во однос на почетокот на војната во Иран, кога нето 35 отсто од инвеститорите имаа зголемена изложеност (overweight) на европски акции.
Влошената перцепција за економскиот раст на Европа е главната причина за оваа промена, покажуваат податоците на Банката на Америка. Нето 23 отсто од инвеститорите очекуваат раст на европските акции во краток рок, додека 58 отсто очекуваат раст во следните 12 месеци - најниски нивоа од април минатата година.
„Загриженоста од минатиот месец дека изложеноста на акции е преголема, сега се претвори во страв дека таа е премала“, напишаа стратезите на Банката на Америка, меѓу кои и Андреас Брукнер.
.webp){kind=icon}
