„Спејсекс“ (SpaceX) на Илон Маск им порачува на инвеститорите дека обезбедил инвестициски рејтинг од трите водечки агенции за кредитен рејтинг, тврдат извори запознаени со ова прашање. Тоа би можело да ѝ помогне на компанијата да ги намали трошоците за финансирање додека продолжува да прибира капитал по иницијалната јавна понуда (ИПО).
Се очекува ИПО-то на компанијата да собере околу 75 милијарди долари, а формирањето на цената на акциите е предвидено за четврток, додека тргувањето би требало да почне следниот ден. Одделни аналитичари на пазарот на долг веќе предвидуваат кој би можел да биде следниот чекор на компанијата, а тоа е пред сè задолжување на пазарите на долг со инвестициски рејтинг.
Аналитичарите на „Кредитсајтс“ (CreditSights) оваа недела изјавија дека очекуваат издавање долг „набргу по ИПО-то“. „Спејсекс“ има заем од 20 милијарди долари кој доспева во септември 2027 година. Тој заем го сочинува најголемиот дел од долгорочниот долг на „Спејсекс“, кој на 31 март изнесувал 29,1 милијарда долари, наведе компанијата во својата пријава за ИПО до Комисијата за хартии од вредност и берза (СЕК).
Не е сосема јасно каков вид кредитен рејтинг кај „Спејсекс“ би претставувал инвестициски ранг, односно дали тоа се однесува, на пример, на неговите обезбедени рејтинзи. „Спејсекс“ во првиот квартал забележал нето-загуба од 4,28 милијарди долари при приход од 4,69 милијарди долари, во споредба со нето-загуба од 528 милиони долари при приход од околу четири милијарди долари во истиот период лани, се наведува во пријавата.
Клучните договори обезбедуваат стабилност
Сепак, компанијата има неколку клучни договори што ќе генерираат идни приходи. Меѓу нив е и договорот со „Гугл“ (Google) на „Алфабет“ (Alphabet), кој се согласил да му плати на „Спејсекс“ 30 милијарди долари за компјутерска моќ во рамки на договор за облачни услуги што трае до средината на 2029 година. Компанијата има и договор вреден околу 45 милијарди долари со „Антропик“ (Anthropic PBC), кој го покрива периодот од приближно следните три години.
Тоа веројатно би било доволно компанијата да добие високи кредитни рејтинзи дури и ако веќе не ги поседува, изјави Дејвис Хеберт, аналитичар во „Кредитсајтс“.
Други компании имаа значително подолг пат до статус на инвестициски рејтинг. На пример, компанијата на Маск, „Тесла“ (Tesla Inc.), производител на електрични автомобили, со години имаше шпекулативен рејтинг, познат и како „џанк“ рејтинг, пред да обезбеди високи оценки.
„Мислам дека не постои никаков преседан што би можеле да го примениме на компанија како „Спејсекс“ за да разбереме каков би требало да биде нејзиниот рејтинг“, изјави Закари Грифитс, раководител за макростратегија за инвестициски рејтинг во „Кредитсајтс“.
„Негативната добивка вообичаено не се поврзува со компании со инвестициски рејтинг, но овде ништо не е вообичаено; ова е категорија сама за себе“, додаде Грифитс.
Приватни кредитни рејтинзи и структурата на долгот
Компаниите понекогаш добиваат приватни кредитни рејтинзи кои не се јавно достапни. Тие, исто така, можат да добијат неформални повратни информации од агенциите за кредитен рејтинг кои не претставуваат официјална оценка.
Според пријавата за ИПО, „Спејсекс“ е обврзан приходите од одредени должнички финансирања, како и од самото ИПО, да ги искористи за отплата на барем дел од премостувачкиот заем од 20 милијарди долари во рок од шест месеци по приемот на средствата. Голем дел од тој заем бил искористен за отплата на висококаматен и високоризичен долг, познат како „џанк“ долг, на компаниите на Маск од секторите на социјалните мрежи и вештачката интелигенција.
Компанијата во својата пријава за ИПО навести дека веќе има инвестициски рејтинг, наведувајќи: „Наша цел е да одржиме кредитен рејтинг од инвестициски ранг.“
На 31 март компанијата имала околу 29 милијарди долари долгорочен долг, се наведува во документацијата.
„Мудис рејтингс“ (Moody’s Ratings), „Фич рејтингс“ (Fitch Ratings) и „Ес-енд-Пи глобал рејтингс“ (S&P Global Ratings) ѝ доделиле инвестициски рејтинг на компанијата, тврдат лица запознаени со ситуацијата кои поради доверливоста на податоците сакале да останат анонимни.
Претставниците на „Мудис“ и „Спејсекс“ не одговориле веднаш на барањата за коментар. Од „Фич“ одбиле да коментираат, освен што посочиле дека немаат објавено рејтинг за „Спејсекс“. „Ес-енд-Пи глобал рејтингс“ соопшти дека сѐ уште нема издадено рејтинг за компанијата.
Со придонес од Кевин Кингсбери, Калеб Мутуа, Шенон Д. Харингтон и Ден Вилчинс
.webp){kind=icon}
