„Макпетрол“ со поголеми приходи и добивка во 2025

„Макпетрол“ ја заврши 2025 година со подобри резултати од претходната, покажува финансискиот извештај на компанијата.

Профитабилноста порасна на сите нивоа, подобрена е структурата на продажбите (повеќе гас и млазни горива), покажана е подобра оперативна ефикасност и  проширување на маржата, со минимален раст на приходите.

Оперативните приходи  во 2025 се зголемени за само 0,42 отсто на речиси 31 милијарда денари (околу 504 милиони евра), додека добивката пред оданочување е поголема за 13,4 отсто и изнесува 1,31 милијарда денари (околу 21 милион евра). Ова значи дека профитабилноста пораснала многу повеќе од приходите. Бруто маржата е покачена за 1,18 п.п., на 15,18 отсто, додека нето маржата за 0,49 п.п. на 4,23 отсто. Повратот на средствата (ROA) е 10,29 отсто, повисок за 0,52 п.п., додека повратот на капитал (ROE) е 12,16 отсто, за 0,68 п.п. повеќе.

Нема видливи еднократни  манипулации и билансот на состојба е многу силен.  

 

 

Планот за управување е надминат за 5,16 проценти, главната причина за надминување на планот е силниот раст на малопродажниот и големопродажниот сегмент. Приносот  од дивиденда 4,53 проценти.

Со оглед на ниската задолженост (обврските само 15 проценти од активата) и стабилниот капитал, ROE од 12 проценти е солидно, но не и спектакуларно ниво за енергетска компанија.

Растот на бизнисот (приходите) е номинално низок, но треба да се земе предвид падот на цените на дериватите на светските берзи, зголемувањето на обемот на прометот во малопродажбата (+2,97 проценти), силниот раст во големопродажбата (+10,59 проценти). Што значи, растот дошол  од обемот, а не од цените, а тоа е поквалитетен облик на раст.