„Лукоил“ му продава најголем дел од странските средства на американскиот гигант „Карлајл“

Руската „Лукоил“ (Lukoil PJSC) се согласи да му го продаде поголемиот дел од своите меѓународни средства на американскиот гигант за приватен капитал „Карлајл“ (Carlyle Group).

Договорот не ги опфаќа средствата во Казахстан, соопшти енергетскиот производител во изјава во четвртокот. „Лукоил“ наведе дека трансакцијата подлежи на регулаторни одобренија и дека продолжува разговори со други потенцијални купувачи. Финансиските услови не беа објавени.

САД лани ја ставија компанијата на црната листа, заедно со конкурентот „Роснефт“ (Rosneft PJSC), додека администрацијата на Трамп го засили притисокот врз Кремљ за да ѝ се стави крај на војната во Украина. Потегот предизвика шок низ земјите во кои работи „Лукоил“, поради што некои влади побараа од Вашингтон специјални лиценци.

„Лукоил“ во октомври објави дека се договорил да му ги продаде своите меѓународни средства на трговецот со енергија „Гунвор“ (Gunvor Group), но договорот пропадна откако американското Министерство за финансии го опиша „Гунвор“ како „марионета“ на Кремљ. Оттогаш, средствата привлекоа интерес и од компании како „Ексон мобил“ (Exxon Mobil Corp.), „Шеврон“ (Chevron Corp.) и „Абу Даби оил“ (Abu Dhabi National Oil Co.).

Како меѓународно најдиверзифицирана руска нафтена компанија, „Лукоил“ има удели во рафинерии во Европа, значајна сопственост во нафтени полиња од Ирак до Казахстан и мрежа од 5.300 бензински пумпи во 20 земји.

Нејзиниот меѓународен бизнис на трговија со нафта мораше да ги намали операциите на некои локации. Во САД, бензинските пумпи поврзани со компанијата се соочија со проблеми при плаќањата со картички, додека нејзината единица за малопродажба на горива „Ој Тебоил“ (Oy Teboil Ab) поднесе барање за стечај во Финска.

Специјалните отстапки што дозволуваа одредени операции и трансакции на „Лукоил“ беа продолжувани неколкупати, но повеќето треба да истечат на 28 февруари.