Глад за обврзниците на „Алфабет“ – побарани 25 милијарди, инвеститорите нудат 115 милијарди долари

„Алфабет“ доби нарачки од околу 115 милијарди долари за својата најнова мега продажба на обврзници, што сигнализира обновен апетит на инвеститорите за корпоративен долг поврзан со бумот на вештачката интелигенција по неодамнешната распродажба на акции во секторот.

Со книга на нарачки од таа големина, зделката привлече над четири пати повеќе од првично планираните 25 милијарди долари, според луѓе запознаени со ова прашање, кои побараа да не бидат идентификувани бидејќи не се овластени јавно да зборуваат.

„Банката на Америка“, „Ситигруп“ и „Велс Фарго“ - тројца од банките менаџери на продажбата на обврзници во четврток - одбија да коментираат. „Алфабет“ и другите менаџери на зделката - „Голдман Сакс“, „Џеј Пи Морган“ и „Морган Стенли“ - не одговорија.

Побарувачката ја надминува онаа што се гледа кај другите неодамнешни понуди на обврзници од компании поврзани со вештачка интелигенција,  вклучувајќи ги „Амазон“ и „Спејс екс“. Зделката со „Алфабет“ им нуди на инвеститорите релативно високи концесии за да привлече побарувачка.

Компанијата, која е сопственик на „Гугл“  и „Јутјуб“, нуди обврзници дури во десет транши, со рок на достасување од две до 40 години, изјави друго лице запознаено со трансакцијата. Првичните разговори за цената на траншата со најдолг рок предвидуваат премија од околу 1,55 процентни поени над приносот на американските државни обврзници.